Gürcüstan əhalisinin sayı son 10 ildə 208,5 min nəfər artıb – Ən çox artım bu regionlardadır

2015–2025-ci illərdə Gürcüstan əhalisinin sayı 5,6% (208,5 min nəfər) artaraq 3 milyon 721,9 mindən 3 milyon 930,4 min nəfərə çatıb. Eyni dövrdə ölkədə şəhər əhalisinin xüsusi çəkisi artıb, kənd əhalisinin sayı isə azalıb.

InterPress.ge xəbər verir ki, bu barədə Gürcüstan Milli Statistika Xidməti (Sakstat) məlumat yayıb.

Sakstatın məlumatına görə, 2015–2021-ci illərdə ölkə əhalisinin sayı nisbətən mülayim templə artıb. Həmin dövrdə artım 63,5 min nəfər (1,7%) təşkil edib. Lakin 2022-ci il yanvarın 1-nə olan vəziyyətə görə, əhalinin sayı əvvəlki illə müqayisədə 25 min nəfər azalıb.

Sonrakı dövrdə isə tendensiya kəskin dəyişib. 2022–2025-ci illərdə ölkə əhalisi 169,9 min nəfər (4,5%) artıb.

2015–2019-cu illərdə təbii artım müsbət olsa da, tədricən azalıb. Miqrasiya saldosu isə əsasən mülayim səviyyədə qalıb. 2020-ci ildən etibarən təbii artım göstəricisi mənfi olub.

2020-ci ildə mənfi təbii artım (-4 min nəfər) və müsbət miqrasiya saldosu (+19,1 min nəfər) nəticəsində 2021-ci il yanvarın 1-nə ölkə əhalisinin sayı təxminən 15 min nəfər artıb. 2021-ci ildə isə mənfi təbii artım (-14 min nəfər) və mənfi miqrasiya saldosu (-11 min nəfər) səbəbindən 2022-ci il yanvarın 1-nə əhalinin sayı 25 min nəfər azalıb.

2022–2024-cü illərdə Gürcüstanda təbii artım göstəricisi mənfi olub. Bu dövrdə təbii azalma ümumilikdə 13,8 min nəfər təşkil edib. Buna baxmayaraq, 2022-ci il yanvarın 1-dən 2025-ci il yanvarın 1-dək ölkə əhalisinin ümumi sayı 169,9 min nəfər artıb. Sakstat bu dəyişikliyin demoqrafik proseslərin birgə nəticəsi olduğunu bildirir.

2015–2025-ci illərdə əhalinin sayı əsasən Tbilisi, Acarıstan Muxtar Respublikası və Kvemo Kartli regionlarında artıb. Digər regionlarda əhalinin sayı azalıb, Mtsxeta-Mtianeti regionunda isə demək olar ki, dəyişməyib.

Həmin dövrdə urbanizasiya səviyyəsinin yüksəlməsi tendensiyası müşahidə olunub. 2015-ci il yanvarın 1-nə şəhər yaşayış məntəqələrində 2 milyon 135,6 min nəfər yaşayırdı ki, bu da ölkə əhalisinin 57,4%-ni təşkil edirdi.

2025-ci ildə şəhər əhalisinin sayı 2 milyon 445,4 min nəfərə çatıb, onun ölkə əhalisindəki payı isə 62,2% olub. Beləliklə, 2015–2025-ci illərdə urbanizasiya səviyyəsi 4,8 faiz bəndi artıb.

Bu müddətdə şəhər əhalisinin sayı 309,8 min nəfər və ya 14,5% artdığı halda, kənd əhalisinin sayı 101,3 min nəfər və ya 6,4% azalıb. Beləliklə, 2015–2025-ci illərdə ölkə əhalisinin ümumi artımı tamamilə şəhər əhalisinin sayının yüksəlməsi hesabına baş verib.

Sakstatın məlumatına görə, 2015–2025-ci illərdə əhalinin sayının artması ilə yanaşı, onun cins və yaş strukturu da dəyişib.

Kişilərin sayı 1 milyon 777,1 mindən 1 milyon 881,4 minə, qadınların sayı isə 1 milyon 944,8 mindən 2 milyon 49 minə yüksəlib. Hər iki cins üzrə artım demək olar ki, eyni olub.

Nəticədə kişilərin ümumi əhalidəki payı 47,7%-dən 47,9%-ə yüksəlib, qadınların payı isə 52,3%-dən 52,1%-ə enib. Hər 100 qadına düşən kişilərin sayı 91,4-dən 91,8-ə çatıb. Bu isə cinslər arasındakı fərqin cüzi azaldığını göstərir.

Yaş strukturunda ən nəzərəçarpan dəyişiklik yaşlı əhalinin sayının artması olub. 65 və yuxarı yaşda olan insanların sayı 531,3 mindən 690,4 minə yüksəlib. Bu, 159,1 min nəfər və ya 29,9% artım deməkdir. Yaşlı əhalinin ümumi əhalidəki payı isə 14,3%-dən 17,6%-ə çatıb.

0–14 yaş qrupuna daxil olan əhalinin sayı 702,8 mindən 773,3 minə yüksəlib. Bu yaş qrupunun ümumi əhalidəki payı 18,9%-dən 19,7%-ə artıb.

15–64 yaş qrupunda isə əks tendensiya qeydə alınıb. Ölkə əhalisinin ümumi sayı artsa da, bu yaş qrupundakı insanların sayı 2 milyon 487,8 mindən 2 milyon 466,7 minə, yəni 21,1 min nəfər azalıb. Onların ümumi əhalidəki payı 66,8%-dən 62,8%-ə düşüb.

2015–2024-cü illərdə Gürcüstanda ümumi müsbət miqrasiya saldosu 212,7 min nəfər olub.

2015–2019-cu illərdə miqrasiya axınları nisbətən sabit olub. İmmiqrantların sayı 84,3–94,1 min, emiqrantların sayı isə 75,7–90,8 min arasında dəyişib. Bu səbəbdən miqrasiya saldosu nisbətən aşağı, lakin müsbət səviyyədə – 1,1–8,6 min nəfər arasında olub.

2020–2021-ci illərdə miqrasiya axınlarının həcmi kəskin dəyişib. 2020-ci ildə emiqrantların sayı 58 min nəfərə qədər azalıb və nəticədə miqrasiya saldosu 19,1 min nəfər təşkil edib. 2021-ci ildə isə hesabat dövrü ərzində ilk dəfə mənfi miqrasiya saldosu qeydə alınıb – mənfi 11 min nəfər.

2022–2024-cü illərdə miqrasiya fəallığı kəskin artıb və yüksək müsbət saldo qeydə alınıb. 2022-ci ildə immiqrantların sayı 200,2 min nəfərə çatıb, miqrasiya saldosu isə hesabat dövrünün ən yüksək göstəricisi olan 89 min nəfər təşkil edib.

2023-cü ildə müsbət miqrasiya saldosu 54,8 min, 2024-cü ildə isə 40 min nəfər olub. Beləliklə, 2022–2024-cü illərin payına 2015–2024-cü illərdə qeydə alınmış ümumi müsbət miqrasiya saldosunun təxminən 86%-i düşüb.

Xatırladaq ki, Gürcüstan Milli Statistika Xidməti 2015–2025-ci illər üzrə əhalinin sayı və əsas demoqrafik göstəricilərə dair məlumatları yenidən hesablayıb. Yenidən hesablamaya 2024-cü ildə keçirilmiş əhali siyahıyaalmasının nəticələri səbəb olub. Məqsəd əvvəlki illərə aid statistik məlumatların siyahıyaalmanın nəticələri ilə uyğunlaşdırılmasıdır.