Suxumin süqutunun 33-cü ildönümü ilə əlaqədar dövlət bayraqları endirilib

Suxumin süqutunun 33-cü ildönümü ilə əlaqədar Gürcüstanın inzibati binalarında dövlət bayraqları endirilib.

InterPress.ge xəbər verir ki, Suxumin süqutunun 33-cü ildönümü və Abxaziya müharibəsində həlak olanların xatirəsinə ehtiram əlaməti olaraq Gürcüstan hökumət administrasiyasının binasında dövlət bayrağı endirilib.

Hökumətin qərarına əsasən, dövlət bayrağı Gürcüstan ərazisindəki bütün inzibati qurumların binalarında endirilib.

Suxumin süqutundan 33 il ötür.

Abxaziyada hərbi qarşıdurma 1992-ci il avqustun 14-də başlayıb. Soçi-İnqiri dəmir yolu xəttinin təhlükəsizliyini təmin etmək məqsədilə Abxaziya ərazisinə daxil olan Gürcüstan Müdafiə Nazirliyinin Milli Qvardiyasına Oçamçire rayonunun Oxurei kəndi yaxınlığında Abxaziya Ali Şurasının sədri Vladislav Ardzinbanın göstərişi ilə yaradılmış “Abxaz Qvardiyası” tərəfindən atəş açılıb.

Dövlət Şurası Soçi-İnqiri dəmir yolu xəttinin təhlükəsizliyini təmin etmək üçün avqustun 11-də Vladislav Ardzinba ilə razılaşdıqdan sonra Abxaziyaya Milli Qvardiyanın yeridilməsi barədə qərar qəbul edib. Razılaşmaya baxmayaraq, “Abxaz Qvardiyası” Gürcüstan Milli Qvardiyasının Abxaziya ərazisində hərəkətinə Oçamçire və Qulripşi rayonlarında, eləcə də Suxumi şəhərində müqavimət göstərib. Bu isə Abxaziyada hərbi əməliyyatların başlamasına səbəb olub.

Abxaziyada hərbi qarşıdurma 13 ay 13 gün davam edib və 1993-cü il sentyabrın 27-də Suxuminin süqutu və Gürcüstan Silahlı Qüvvələrinin məğlubiyyəti ilə başa çatıb.

1993-cü il sentyabrın 16-da Abxaz tərəfi iyulun 27-də imzalanmış “Atəşkəs və qüvvələrin ayrılması haqqında” Soçi razılaşmasını pozaraq Suxumini ələ keçirmək üçün hücuma başlayıb. Suxumi uğrunda döyüşlər 11 gün davam edib. Abxaz-Rusiya, Şimali Qafqaz və kazak dəstələri sentyabrın 27-də səhər saatlarından etibarən Abxaziya Nazirlər Şurasının binasına hücum edib. Onlar Abxaziya Nazirlər Şurasının sədri Jüli Şartavanı, Suxumi şəhərinin meri Quram Qabeskerianı və Nazirlər Şurasının 27 əməkdaşını əsir götürüb, daha sonra onların hamısını güllələyiblər.

Rusiya-Abxaz qüvvələri 1993-cü il sentyabrın 30-da İnquri çayı boyunca mövqelər tutublar. Özünü Abxaziya Respublikası elan edən qurumun hakimiyyəti hər il sentyabrın 30-da “Gürcüstan üzərində qələbə və Abxaziyanın müstəqilliyi günü”nü qeyd edir.

Gürcü tərəfinin bu günə qədər dəqiqləşdirilməmiş məlumatlarına görə, 1992-1993-cü illərdə Abxaziyada gedən hərbi qarşıdurma zamanı Gürcüstan tərəfindən 10 mindən çox hərbçi və dinc sakin həlak olub. 300 min gürcü isə Abxaziyadan didərgin düşərək evsiz qalıb.

Abxaz tərəfinin məlumatlarına görə isə müharibə zamanı 3 500 nəfər həlak olub, 2 minə yaxın şəxs yaralanıb.