Ramilia Əliyeva: Kimə lazımdır ki, Gürcüstan və Azərbaycan qarşı-qarşıya gəlsin?

İctimai Yayımçının “Rəngarəng Gürcüstan” Departamentinin rəhbəri, jurnalist Ramilia Əliyeva Azərbaycan ərazisində, Qax rayonunda yerləşən Kürmük məbədi ətrafında son günlər aparılan müzakirələrə münasibət bildirib və Gürcüstan-Azərbaycan münasibətlərində gərginlik yaradılmasına kimin maraqlı ola biləcəyi sualını gündəmə gətirib.

InterPress.ge xəbər verir ki, Ramilia Əliyeva sosial şəbəkədə paylaşdığı geniş yazıda son dövrdə baş verən bir sıra hadisələri xronoloji şəkildə əlaqələndirib və bunların iki ölkə arasında etimadsızlıq yaratmağa yönəlmiş informasiya kampaniyasının əlamətləri ola biləcəyini bildirib.

Onun sözlərinə görə, 2026-cı il aprelin 6-da “Gürcü Arzusu”nun təsisçisi və fəxri sədri Bidzina İvanişvili Azərbaycan Prezidenti İlham Əliyevlə görüşüb. Əliyeva qeyd edib ki, görüşdə birgə layihələr, iki ölkə arasında strateji tərəfdaşlığın daha da dərinləşdirilməsi, iqtisadiyyat, enerji və nəqliyyat məsələləri müzakirə olunub.

“Bundan sonra Gürcüstan-Azərbaycan münasibətlərində çox fəal mərhələ başladı. Xüsusilə Gürcüstan-Azərbaycan iqtisadi və enerji əməkdaşlığı daha da intensivləşdi. Təbii qazın tədarükü və tranziti ilə bağlı uzunmüddətli razılaşmalar imzalandı. Gürcüstan Azərbaycanın elektrik enerjisinin, o cümlədən yaşıl enerji dəhlizinin inkişafı çərçivəsində Avropa bazarlarına ötürülməsində daha mühüm tranzit halqaya çevrildi. Bakı-Tbilisi-Qars dəmir yolu xətti fəaliyyətə başladı”, – deyə Əliyeva yazıb.

O, daha sonra Gürcüstanda müəyyən qrupların Patriarx Şio III-ün çıxışlarından birindən sonra onun əleyhinə kampaniya apardığını və bu prosesdə Gürcüstan azərbaycanlıları arasında da müəyyən narazılıqların yaradıldığını iddia edib.

Əliyevanın sözlərinə görə, sentyabrın 21-də Tbilisidə Heydər Əliyevin büstünün vandalizm nəticəsində ciddi şəkildə zədələnməsindən sonra isə Azərbaycanda, Qaxda yerləşən Kürmük məbədinin ərazisində çəkilmiş foto və videoları yayımlayan, mənşəyi və məqsədi ictimaiyyətə məlum olmayan bir “Facebook” səhifəsi ortaya çıxıb.

O bildirib ki, həmin görüntülərlə bağlı ilk mərhələdə kadrların kim tərəfindən və nə vaxt çəkildiyi, ərazidə hansı işlərin aparıldığı, eləcə də həmin işlərin hüquqi və arxeoloji əsaslarının nə olduğu barədə tam məlumat olmayıb.

“Amma buna baxmayaraq, Gürcüstanda müəyyən bloqerlər, jurnalistlər və müxtəlif informasiya platformaları bütün bunları çox sürətlə yaymağa başladılar. Nəticədə belə bir narrativ formalaşdı: Azərbaycan informasiya məkanında, o cümlədən Gürcüstan azərbaycanlıları arasında – ‘Gürcüstan azərbaycanlıları təhqir edir, Tbilisidə Heydər Əliyevin büstünü vandalcasına zədələyiblər’. Gürcü informasiya məkanında isə – ‘Azərbaycanda gürcü kilsəsini dağıdırlar’.

Hər iki halda məqsəd eyni idi – gürcülərlə azərbaycanlılar arasında etimadsızlıq yaratmaq”, – deyə Əliyeva qeyd edib.

Jurnalist daha sonra Gürcüstan Patriarxlığının Kürmük məbədi ilə bağlı açıqlamasını və Azərbaycan Xarici İşlər Nazirliyinin buna cavabını xatırladaraq, hazırda müəyyən qrupların iki ölkənin ictimai məkanında qarşılıqlı qıcıq və etimadsızlıq yaratmağa çalışdığını bildirib.

“Burada mənim üçün ən əsas sual yaranır: bütün bunlar kimə lazımdır? Həqiqətən inanmalıyıq ki, bütün bunlar bir-birindən tamamilə müstəqil və təsadüfi hadisələrdir? Halbuki bu hadisələri vahid bir narrativ birləşdirir. Bu narrativ kimə sərf edir?

Mən buna bu qədər sadə yanaşa bilmirəm. Biz kiçik qız-oğlan deyilik. Bir qədər xronologiyanı müəyyənləşdirmək və hadisələrə daha geniş prizmadan baxmaq lazımdır”, – deyə Əliyeva yazıb.

Onun fikrincə, baş verənlərdə məqsədyönlü informasiya kampaniyasının əlamətləri görünür və bunun əsas məqsədlərindən biri Gürcüstan-Azərbaycan münasibətlərində gərginlik yaratmaq ola bilər.

Əliyeva həmçinin hesab edir ki, digər məqsəd Gürcüstan vətəndaşı olan azərbaycanlılarda iki konkret hədəfə qarşı etimadsızlıq yaratmaqdır. O, kampaniyanın iki mühüm hədəf şəxsi olduğunu iddia etsə də, onların adlarını açıqlamayıb.

“Mən demirəm ki, bu gün konkret şəxslərin və ya konkret qüvvələrin adını çəkə və bütün bunların arxasında məhz onların dayandığını iddia edə bilərik. Amma bir məqamı həqiqətən diqqətəlayiq hesab edirəm: çoxlu sayda hadisə çox qısa müddətdə vahid informasiya zəncirində birləşdi və bu zəncirin ümumi nəticəsi bir istiqamətə – Gürcüstan-Azərbaycan münasibətlərini gərginləşdirmək istəyinə doğru gedir”, – deyə Əliyeva bildirib.

Jurnalist hesab edir ki, Azərbaycan və Gürcüstan arasında belə məsələlər yalnız rəsmi məktublar vasitəsilə müzakirə ediləcək münasibətlər mövcud deyil. Onun fikrincə, hər iki ölkə süni şəkildə qarşıdurma yaradılması cəhdlərinin əlamətlərini görməlidir.

Əliyeva qeyd edib ki, zərurət yaranarsa, hər iki ölkənin aidiyyəti dövlət qurumları birbaşa kommunikasiya yolu ilə hadisələrin əslində necə baş verdiyini, dezinformasiyanın kim tərəfindən yayıldığını, konkret narrativlərin haradan başladığını və iki ölkə arasında münasibətlərin gərginləşdirilməsində kiminsə məqsədyönlü marağının olub-olmadığını müəyyənləşdirməlidir.

“Çünki məsələ artıq təkcə Heydər Əliyevin büstü ilə bağlı deyil. Həm də yalnız Kürmük məbədi ilə bağlı deyil. Məsələ Gürcüstan və Azərbaycan arasında etimaddan gedir.

Ona görə də hər iki ölkənin dövlət təhlükəsizlik xidmətləri birgə şəkildə müəyyən etməlidir ki, Gürcüstan-Azərbaycan münasibətlərində sualların yaranmasını bu qədər fəal şəkildə kim istəyir.

Həmçinin, dostlar, sosial şəbəkələrdə və ya şəxsi münasibətlərdə bir-birimizə qarşı çıxmazdan əvvəl, məncə, çox sadə bir sual verməliyik: Gürcüstan və Azərbaycanın qarşı-qarşıya gəlməsi kimə lazımdır?” – deyə Ramilia Əliyeva yazıb.

Əliyeva paylaşımının sonunda bütün bu proseslərin Gürcüstan vətəndaşı olan azərbaycanlılarla, eləcə də 2028-ci il seçkiləri ilə əlaqəsinin ayrıca müzakirə edilməli mövzu olduğunu bildirib.