Prokurorluq İrakli Qaribaşvilinin ittiham olunduğu rüşvət sxeminin təfərrüatlarını açıqlayıb

Gürcüstan Baş Prokurorluğu keçmiş müdafiə naziri Cuanşer Burçuladze və nazirliyin digər yüksək vəzifəli şəxsləri ilə birlikdə həbsdə olan keçmiş baş nazir İrakli Qaribaşvilinin də iştirak etdiyi iddia olunan külli miqdarda rüşvət alma sxeminin təfərrüatlarını açıqlayıb.

InterPress.ge xəbər verir ki, prokurorluğun məlumatına görə, Müdafiə Nazirliyi üçün tibbi avadanlıq və inventarın satın alınması prosesində İrakli Qaribaşvili şəxsən 750 min lari məbləğində rüşvət alıb. Ümumilikdə isə dövlətə 6 milyon 985 min 255 lari məbləğində əmlak zərəri dəydiyi və ictimai maraqların əhəmiyyətli şəkildə pozulduğu bildirilir.

Prokurorluğun açıqlamasına görə, 2026-cı il avqustun 12-də Gürcüstanın keçmiş müdafiə nazirinin qohumu, məhkum Vasil Mxeidze istintaqla əməkdaşlıq etmək istəyi ilə prokurorluğa müraciət edib və əlində olan məlumatları təqdim edib. Həmçinin Cuanşer Burçuladze dindirilib və istintaqla əməkdaşlıq edib.

İstintaqın məlumatına əsasən, 2021-2024-cü illərdə İrakli Qaribaşvili baş nazir vəzifəsini tutduğu dövrdə hökumətin əsas fəaliyyət istiqamətlərini müəyyənləşdirib, hökumətin fəaliyyətini təşkil edib, nazirlərin fəaliyyətini koordinasiya və nəzarətdə saxlayıb. Həmin dövrdə Cuanşer Burçuladze müdafiə naziri olub və baş nazir qarşısında hesabat verib.

Prokurorluğun bildirdiyinə görə, 2022-ci ilin sonlarından Müdafiə Nazirliyində bahalı tibbi avadanlıq və inventarın alınmasına ehtiyac yaranıb və bu satınalmaların məxfi prosedurla həyata keçirilməsi nəzərdə tutulub.

İstintaqın versiyasına görə, Cuanşer Burçuladze ilə razılaşan Vasil Mxeidze satınalma prosedurlarında iştirak etmək üçün müvafiq təcrübəyə malik biznesmenlə əlaqə saxlayıb. Ona satınalmanın elə formada keçirilməsi təklif olunub ki, biznesmenlə əlaqəli şirkətin arzuolunan qiymətlə qalib gəlməsi təmin edilsin. Bunun müqabilində müqavilənin ümumi dəyərinin 10 faizinin nağd şəkildə verilməsi tələb olunub.

Prokurorluğun məlumatına görə, biznesmen daha yüksək vəzifəli şəxslərdən təminat tələb etdikdən sonra Cuanşer Burçuladze o vaxtkı baş nazir İrakli Qaribaşvili ilə razılaşıb. İddia olunur ki, satınalmaların həmin şirkətlərin əvvəlcədən müəyyən edilmiş qiymətlə qalib gəlməsini təmin edən formada həyata keçirilməsi və bunun müqabilində qanunsuz maliyyə gəliri əldə edilməsi barədə razılıq əldə olunub.

Bundan sonra, prokurorluğun versiyasına əsasən, Qaribaşvilinin himayəsi ilə Müdafiə Nazirliyinin həmin vaxtkı müavini Giorgi Xainrdava və Satınalmalar Departamentinin rəhbəri Vladimir Qudauşauri məxfi satınalmalar zamanı rəqabətsiz mühit yaradıb.

Nəticədə üç məxfi satınalma çərçivəsində real dəyəri 11 milyon 499 min 705 lari olan tibbi avadanlıq və digər inventar dövlətə 18 milyon 484 min 960 lariyə təqdim edilib.

İstintaqın məlumatına görə, satınalmalarda iştirak edən biznesmen təminat və himayənin müqabilində Vasil Mxeidzeyə mərhələlərlə ümumilikdə 1 milyon 900 min lari nağd pul verib. Mxeidze bu məbləğin 400 min larisini şəxsi gəlir kimi saxlayıb, qalan 1 milyon 500 min larini isə Cuanşer Burçuladzeyə verib.

Prokurorluq bildirir ki, Burçuladze aldığı 1,5 milyon laridən 750 min larini özü saxlayıb, digər 750 min larini isə bir neçə mərhələdə İrakli Qaribaşviliyə rüşvət kimi təqdim edib.

İddia olunan əməllər nəticəsində dövlətə 6 milyon 985 min 255 lari məbləğində böyük həcmdə əmlak zərəri dəydiyi və ictimai maraqların əhəmiyyətli şəkildə pozulduğu bildirilir.

İrakli Qaribaşviliyə Gürcüstan Cinayət Məcəlləsinin 338-ci maddəsinin ikinci hissəsinin “a” və “c” bəndləri, həmçinin üçüncü hissəsinin “e” bəndi ilə ittiham irəli sürülüb. Maddə dövlət-siyasi vəzifə tutan şəxs tərəfindən qrup halında xüsusilə külli miqdarda rüşvət alınmasını nəzərdə tutur və 11 ildən 15 ilədək azadlıqdan məhrumetmə cəzası müəyyən edir.

Prokurorluq qeyd edib ki, iş üzrə digər vəzifəli şəxslər artıq məhkəmə tərəfindən təqsirli bilinərək müvafiq cəzalara məhkum ediliblər. Onların arasında Cuanşer Burçuladzeyə 10 il müddətinə azadlıqdan məhrumetmə cəzası verilib.

Baş Prokurorluq İrakli Qaribaşvili ilə bağlı iş üzrə yalnız məhkəmədən ibtidai iclasın tarixinin müəyyənləşdirilməsini istəyəcək. Buna səbəb onun artıq başqa cinayət işi üzrə çıxarılmış hökm əsasında cəza çəkməsidir.