Gürcüstan dəhlizindən bu ilin ilk 7 ayında 286 mindən çox yük maşını keçib – büdcəyə nə qədər vəsait daxil olub?
2026-cı ilin yanvar-iyul aylarında Gürcüstan dəhlizindən keçən tranzit yük avtomobillərinin sayı ötən ilin eyni dövrü ilə müqayisədə 9 159 ədəd artıb. Bu müddətdə onların ödədiyi yol istifadəsi rüsumlarından dövlət büdcəsinə daxil olan vəsait isə 3,204 milyon lari çoxalıb.
InterPress.ge xəbər verir ki, konsolidasiya nəzərə alınmadan birləşdirilmiş büdcənin gəlirlərinə əsasən, 2026-cı ilin yanvar-iyul aylarında yük avtomobillərinin Gürcüstan ərazisindən keçirilməsindən xəzinəyə 100 175 241 lari daxil olub.
2025-ci ilin eyni dövründə isə bu göstərici 96 970 399 lari təşkil edib.
Büdcəyə daxil olan vəsaitin artması ilə yanaşı, Gürcüstan ərazisindən keçən tranzit yük maşınlarının sayı da yüksəlib.
Belə ki, maliyyə göstəricilərinə əsasən, 2026-cı ilin yanvar-iyul aylarında Gürcüstan dəhlizindən 286 214 yük avtomobili keçib. Ötən ilin eyni dövründə isə bu rəqəm 277 058 olub.
Beləliklə, bir il ərzində tranzit yük avtomobillərinin sayında 9 156 ədəd artım qeydə alınıb.
İllik göstəricilərə gəlincə, 2025-ci ildə yük avtomobillərinin Gürcüstan ərazisindən keçirilməsindən dövlət xəzinəsinə 171 286 748 lari daxil olub. Həmin il ölkə sərhədini orta hesabla 489 390 yük avtomobili keçib.
Qeyd edək ki, Gürcüstan ərazisindən tranzit keçən yük avtomobilləri üçün yol istifadəsi rüsumu 350 lari təşkil edir. Bu tarif 2022-ci il iyunun 20-dən qüvvədədir. Bundan əvvəl yük avtomobillərinin sürücüləri 200 lari ödəyirdilər.
