Telavidə toy zamanı baş verən insident: Saxlanılan Giorgi Çiğladzeyə bu gün ittiham irəli sürüləcəyi gözlənilir

Telavidə hotellərdən birində toy mərasimi zamanı baş vermiş insidentlə əlaqədar qəsdən sağlamlığa yüngül xəsarət yetirmək ittihamı ilə saxlanılan bəyin qardaşı Giorgi Çiğladzeyə bu gün rəsmi ittiham irəli sürüləcəyi gözlənilir.

InterPress.ge xəbər verir ki, hadisə ilə bağlı şahidlərin dindirilməsi gecə saatlarınadək davam edib.

Məlumata görə, istintaq çərçivəsində bəy və gəlin, toy qonaqları, eləcə də müğənni Aleksandre Mrelaşvili daxil olmaqla çoxsaylı şahid ifadə verib.

Təqsirləndirilən şəxsin vəkilinin sözlərinə görə, şahidlər hadisələrin gedişatını ardıcıllıqla təsvir edərək bildiriblər ki, münaqişə hotelin üçüncü mərtəbəsində qalan turistlərin toy iştirakçılarının üzərinə maye tökməsindən sonra başlayıb.

Vəkil bildirib ki, şahidlərdən biri tökülən mayenin xoşagəlməz qoxuya malik olduğunu, onun nə suya, nə də spirtli içkiyə bənzədiyini ifadəsində təsdiqləyib.

Hadisədə iştirak edən xarici ölkə vətəndaşlarının vəkili Lali Aptsiauri isə istintaq sirri ilə bağlı öhdəlik daşıdığı üçün hazırkı mərhələdə işin təfərrüatları barədə danışmaq istəmədiyini bildirib.

Toy iştirakçılarının iddiasına görə su olmayan və xoşagəlməz qoxu gələn mayenin tərkibi ekspertiza tərəfindən müəyyən ediləcək.

Xatırladaq ki, Gürcüstan Daxili İşlər Nazirliyi Telavi bələdiyyəsinin Ruispiri kəndində yerləşən Aqaranis Mamuli kompleksində keçirilən toy mərasimində baş verən insidentlə bağlı Cinayət Məcəlləsinin 120-ci maddəsi (qəsdən sağlamlığa yüngül xəsarət yetirmə) ilə araşdırma aparır.

Hazırda saxlanılan Giorgi Çiğladze Qurcaani müvəqqəti saxlama təcridxanasında saxlanılır.

Qeyd edək ki, Daxili İşlər Nazirliyinin məlumatına əsasən, şahidlərin ifadələrinə görə, hadisə zamanı hoteldə istirahət edən xarici ölkə vətəndaşları eyvandan toy iştirakçılarını təhqir edib və musiqi avadanlığının üzərinə su töküblər. Bundan sonra saxlanılan şəxs xarici ölkə vətəndaşı olan qadına fiziki xəsarət yetirib. Yaralı qadın xəstəxanaya yerləşdirilib. Faktla bağlı istintaq davam etdirilir.