Tbilisi Prokurorluğunda Yetkinlik yaşına çatmayanlarla bağlı işlər üzrə xüsusi idarə yaradılıb
Yetkinlik yaşına çatmayanlar tərəfindən törədilən və onlara qarşı yönəlmiş cinayətlərlə mübarizənin effektivliyinin artırılması məqsədilə 2025-ci ildə Tbilisi Prokurorluğunda Yetkinlik yaşına çatmayanların işləri üzrə idarə yaradılıb.
InterPress.ge xəbər verir ki, bu barədə Baş prokuror Giorgi Qvarakidze parlamentdə Prokurorluğun 2025-ci il üzrə fəaliyyət hesabatını təqdim edərkən bildirib.
Onun sözlərinə görə, yeni yaradılmış idarə yalnız bu kateqoriyadan olan işlərə prosessual rəhbərlik edən və məhkəmədə dövlət ittihamını müdafiə edən ixtisaslaşmış prokurorlarla komplektləşdirilib.
Qvarakidze qeyd edib ki, qanunvericiliyin müəyyən etdiyi meyarlara cavab verən yetkinlik yaşına çatmayan şəxslərlə bağlı hallarda ixtisaslaşmış prokurorlar cinayət təqibinin alternativ mexanizmlərinə üstünlük veriblər. Bu yanaşma ümumilikdə 905 təqsirləndirilən şəxsə tətbiq olunub.
“İctimai maraqlarla yanaşı, Prokurorluğun əsas məqsədi uşaqlara problemli davranışların aradan qaldırılmasında dəstək göstərmək və onlara məhkumluq olmadan həyatlarını davam etdirmək imkanı yaratmaqdır. 2025-ci ildə, əvvəlki illərdə olduğu kimi, diversiya proqramı əsasən oğurluq cinayəti törətmiş 377 (65%) yetkinlik yaşına çatmayan şəxsə tətbiq olunub”, – deyə Baş prokuror bildirib.
Onun sözlərinə görə, yetkinlik yaşına çatmayanlar barəsində seçilən qətimkan tədbirləri və cəzalara gəlincə, 2025-ci ildə tələb olunan qətimkan tədbirlərinin ümumi sayında həbsin payı 31,8 faiz təşkil edib. Diversiya proqramına cəlb olunan şəxslər nəzərə alındıqda isə bu göstərici 9,8 faiz olub.
Baş prokuror əlavə edib ki, həbs cəzasının tətbiqi göstəricisi 25,1 faiz, işlərin ümumi sayında azadlıqdan məhrumetmə cəzasının payı isə 13,1 faiz təşkil edib.
