Gürcüstanda əhalinin neçə faizi Azərbaycan dilli olduğu açıqlandı

Gürcüstanın Milli Statistika Xidmətinin (Sakstat) açıqladığı 2024-cü il əhalinin siyahıyaalınmasının nəticələrinə görə, ölkə əhalisinin böyük əksəriyyəti pravoslav xristianlardan ibarətdir. Eyni zamanda, ana dillər və dini mənsubiyyətlə bağlı yeni statistika da açıqlanıb.

InterPress.ge xəbər verir ki, bu barədə Milli Statistika Xidmətinin direktoru Qoqita Todradze brifinqdə məlumat verib.

Onun sözlərinə görə, Gürcüstan əhalisinin 82 faizini, yəni 3 milyon 223 min nəfərini pravoslav xristianlar təşkil edir. Son 10 ildə onların sayı 4,1 faiz və ya 126 min nəfər artıb.

Todradze bildirib ki, ölkədə daimi yaşayan müsəlman əhalinin payı 11,1 faizdir. Bundan başqa, əhalinin 2,6 faizi Erməni Apostol Kilsəsinə mənsubdur, 0,6 faizi katolikdir, digər dini konfessiyaların nümayəndələrinin ümumi payı isə 3,8 faiz təşkil edir.

InterPress.ge xəbər verir ki, siyahıyaalınmanın nəticələrinə əsasən, Gürcüstan əhalisinin 85 faizi üçün gürcü dili ana dilidir. Bu kateqoriyaya aid vətəndaşların sayı son 10 ildə 2,7 faiz və ya təxminən 89 min nəfər artıb.

Statistikaya görə, ölkə əhalisinin 6,8 faizi üçün ana dili Azərbaycan dilidir. Erməni dili əhalinin 3,5 faizinin, rus dili isə 1,4 faizinin ana dili hesab olunur.

Qeyd edək ki, bu göstəricilər 2024-cü ildə keçirilmiş ümummilli əhalinin siyahıyaalınmasının yekun nəticələri əsasında hazırlanıb və Gürcüstanın etnik, dini və dil mənzərəsini əks etdirir.