Polşada rusiyalı rəssamın qətlində şübhəli bilinən Gürcüstan vətəndaşı həbs edildi

Polşanın Lublin-Zaxud Rayon Məhkəməsi rusiyalı vətəndaşın qətlində şübhəli bilinən 36 yaşlı Gürcüstan vətəndaşı barəsində 3 aylıq həbs-qətimkan tədbiri seçib. Təqsirləndirilən şəxsə qarşı irəli sürülən ittiham təsdiqlənərsə, onu ömürlük həbs cəzası gözləyir.

InterPress.ge xəbər verir ki, bu barədə Lublin Polis İdarəsi məlumat yayıb. Bildirilib ki, Lublin polisinin xüsusi istintaq qrupunun əməkdaşları tərəfindən saxlanılan Gürcüstan vətəndaşı dünən Milli Prokurorluğa aparılıb. Dindirildikdən sonra ona 44 yaşlı Rusiya vətəndaşının qətli ilə bağlı rəsmi ittiham irəli sürülüb.

Polis məlumatına görə, məhkəmə istintaqın maraqlarını nəzərə alaraq şübhəli şəxs barəsində 3 aylıq ilkin həbs qərarı qəbul edib. Polşa qanunvericiliyinə əsasən, qətl ittihamı sübuta yetiriləcəyi təqdirdə, təqsirləndirilən şəxs ömürlük azadlıqdan məhrum edilə bilər.

Xatırladaq ki, iki gün əvvəl Polşanın Baş naziri Donald Tusk Lublin polisi və Daxili Təhlükəsizlik Agentliyinin Biala Podlyaska şəhərində baş vermiş qətl hadisəsi ilə bağlı Gürcüstan pasportuna malik bir şəxsi saxladığını açıqlamışdı.

Hadisə bir neçə gün əvvəl Polşanın Biala Podlyaska şəhərində baş verib. Məlumata görə, 44 yaşlı Rusiya vətəndaşı, rəssam və satirik kimi tanınan Semyon Skrepetski yaşayış binasının yaxınlığında silahlı hücuma məruz qalıb. Naməlum şəxs ona bir neçə dəfə atəş açıb və nəticədə o, həyatını itirib.

Polşa mətbuatının yazdığına görə, Semyon Skrepetski yaradıcılığında Rusiya hakimiyyətini, o cümlədən Rusiya Prezidenti Vladimir Putini tez-tez tənqid edən əsərləri ilə tanınırdı.

Faktla bağlı istintaq davam etdirilir və hüquq-mühafizə orqanları qətlin motivlərini araşdırır.