Urekidə dəniz axını 4 nəfəri apardı – 21 yaşlı gəncin həyatını xilas etmək mümkün olmadı

Gürcüstanın Ureki kurortunda baş verən hadisə zamanı dəniz axını 4 nəfəri aparıb. Hadisə yerinə cəlb olunan xilasedicilər qısa müddətdə hər dörd şəxsi sudan çıxarmağa nail olublar.

InterPress.ge xəbər verir ki, xilas edilən şəxslərdən biri son dərəcə ağır vəziyyətdə olub. Ona hadisə yerində təcili tibbi yardım briqadası tərəfindən ilkin yardım göstərilsə də, həkimlər onun həyatını xilas edə bilməyiblər.

Məlumata görə, həyatını itirən şəxs 21 yaşlı gəncdir.

Hadisə zamanı xilas edilən digər üç nəfərin səhhəti ilə bağlı dəqiq məlumat açıqlanmasa da, mövcud məlumata əsasən onların həyatına təhlükə yoxdur.

Faktla bağlı aidiyyəti qurumlar tərəfindən araşdırma aparılır.