Gürcüstanda yeni qayda: İyulun 1-dən kater, yaxta və hidrosikllərin qeydiyyatı məcburi olacaq
2026-cı il iyulun 1-dən etibarən Gürcüstanın göllərində, çaylarında və su anbarlarında istifadə olunan katerlər, yaxtalar, hidrosikllər və digər mühərrikli üzən nəqliyyat vasitələrinin qeydiyyatı, eləcə də onları idarə etmək üçün xüsusi sertifikatın olması məcburi olacaq.
InterPress.ge xəbər verir ki, bu barədə Gürcüstan Dəniz Nəqliyyatı Agentliyi məlumat yayıb. Qurumun açıqlamasına görə, yeni qaydaların məqsədi daxili sularda gəmiçilik təhlükəsizliyinin artırılması, sərnişinlərin qorunması və mümkün insidentlərin qarşısının alınmasıdır.
Agentliyin məlumatına əsasən, qanunvericiliklə müəyyən edilmiş bütün növ üzən vasitələr – katerlər, yaxtalar, motorlu qayıqlar, hidrosikllər, katamaranlar, sərnişin platformaları və digər analoji nəqliyyat vasitələri məcburi qeydiyyatdan keçməlidir.
Qeydiyyatdan əvvəl hər bir üzən vasitə Agentlik tərəfindən tanınmış nəzarət təşkilatında texniki baxışdan keçməlidir. Qeydiyyat prosesini Gürcüstan İqtisadiyyat və Davamlı İnkişaf Nazirliyinin Dəniz Nəqliyyatı Agentliyi həyata keçirəcək.
InterPress.ge xəbər verir ki, yeni qaydalara əsasən, daxili sularda mühərrikli üzən vasitələri idarə etmək üçün xüsusi idarəetmə sertifikatı da tələb olunacaq.
Sertifikat 18 yaşını tamamlamış və fəaliyyət qabiliyyətli şəxslərə 5 il müddətinə veriləcək. Bunun üçün namizədlər Agentliyin tanıdığı dəniz təlim mərkəzlərində hazırlıq proqramını uğurla başa vurmalıdırlar. Hazırda belə proqramın keçirilməsinə yalnız Batumi Dövlət Dəniz Akademiyasının Dəniz Təlim Mərkəzi akkreditə olunub.
Məlumata görə, 2020-2026-cı illər ərzində Gürcüstanın çaylarında, göllərində və su anbarlarında müxtəlif üzən vasitələrin iştirakı ilə 80 insident qeydə alınıb. Yeni qaydaların tətbiqi bu cür hadisələrin sayının azalmasına xidmət edəcək.
Agentlik bildirir ki, keçid dövrü 2025-ci il aprelin 1-dən başlayıb və bu müddət ərzində məlumatlandırma kampaniyaları həyata keçirilir. Hazırda daxili su hövzələri üzrə gəmi reyestrində artıq 16 üzən vasitə qeydiyyata alınıb, 38 nəfər isə müvafiq idarəetmə sertifikatı əldə edib.
Qaydalar kayaklara və şəxsi istifadə məqsədli bəzi üzən vasitələrə şamil edilməyəcək. Eyni zamanda uzunluğu 3 metrdən az olan və mühərriki olmayan üzən vasitələrin qeydiyyata alınması tələb olunmayacaq.
Dəniz Nəqliyyatı Agentliyi xəbərdarlıq edir ki, könüllü qeydiyyat mərhələsi başa çatdıqdan sonra, 2026-cı il iyulun 1-dən etibarən qeydiyyatsız fəaliyyət və ya sertifikatsız idarəetmə inzibati məsuliyyət və cərimələrlə nəticələnəcək.
