InterPress.ge hüquqi xidmətlər sahəsində yeni layihəyə başlayır – Vətəndaşlar öz hüquqlarını daha asan müdafiə edə biləcəklər

InterPress.ge hüquqi xidmətlərin rəqəmsallaşdırılması, etnik azlıqların hüquqi yardıma çıxış imkanlarının genişləndirilməsi və süni intellekt texnologiyalarının hüquq sahəsinə tətbiqi məqsədilə yeni layihənin icrasına başlayır.

InterPress.ge xəbər verir ki, "Gürcüstan qanunvericiliyi üzrə Hüquqi Yardım" layihəsi çərçivəsində Gürcüstanda yaşayan vətəndaşların, etnik azlıqların, sahibkarların, xarici vətəndaşların və investorların hüquqi xidmətlərə çıxış imkanlarının artırılması nəzərdə tutulur.

Layihə haqqında danışan InterPress.ge xəbər portalının rəhbəri Nahid Qurbanov bildirib ki, təşəbbüsün əsas məqsədi hüquqi xidmətləri insanların yaşadığı yerə, danışdığı dilə və maliyyə imkanlarına bağlı olmadan hər kəs üçün əlçatan etməkdir.

"Uzun illərdir ki, Gürcüstanda yaşayan etnik azlıqların, xüsusilə də Azərbaycan dilli əhalinin informasiya və hüquqi xidmətlərə çıxışı ilə bağlı problemləri yaxından müşahidə edirik. Bir çox insanlar dövlət qurumlarına müraciət etməkdə, hüquqi sənədlər hazırlamaqda və öz hüquqlarını müdafiə etməkdə çətinlik çəkirlər. Bu layihə həmin problemlərin həllinə töhfə vermək məqsədi daşıyır", – deyə Nahid Qurbanov qeyd edib.

Onun sözlərinə görə, layihə çərçivəsində yaradılan platforma istifadəçilərə öz ana dillərində hüquqi məlumat almaq, müxtəlif hüquqi sənədlər hazırlamaq və peşəkar hüquqi yardım əldə etmək imkanı yaradacaq.

"Biz istəyirik ki, Gürcüstanda yaşayan hər bir insan harada yaşamasından asılı olmayaraq hüquqi xidmətlərdən rahat istifadə edə bilsin. İnsanlar öz ana dillərində müraciətlər hazırlaya, hüquqi suallarına cavab ala və ehtiyac yarandıqda peşəkar vəkillərlə birbaşa əlaqə qura biləcəklər. Bu, xüsusilə regionlarda yaşayan insanlar üçün böyük üstünlük olacaq", – deyə o bildirib.

Nahid Qurbanov əlavə edib ki, layihə çərçivəsində yalnız təsdiqlənmiş vəkillər sistemə qoşulacaq və istifadəçilər hüquqi problemlərinin xarakterinə uyğun mütəxəssislərlə video görüşlər keçirə biləcəklər.

"Bu gün bir çox insan hüquqi məsləhət almaq üçün başqa şəhərlərə getməyə məcbur olur. Yeni layihə sayəsində isə istifadəçilər yaşadıqları yerdən çıxmadan vəkillərlə video əlaqə yarada və peşəkar hüquqi yardım ala biləcəklər. Bu həm vaxt, həm də maliyyə baxımından vətəndaşlar üçün böyük üstünlük yaradacaq", – deyə o vurğulayıb.

InterPress.ge rəhbərinin sözlərinə görə, layihənin əsas prioritet istiqamətlərindən biri də etnik azlıqlar üçün mövcud olan dil baryerlərinin aradan qaldırılmasıdır.

"Biz hesab edirik ki, hüquqi xidmətlərə çıxış hər kəs üçün bərabər olmalıdır. İnsan hansı dildə danışmasından asılı olmayaraq öz hüquqlarını müdafiə edə bilməlidir. Layihə məhz bu məqsədə xidmət edir və hüquqi bərabərliyin gücləndirilməsinə töhfə verəcək", – deyə Nahid Qurbanov bildirib.

O qeyd edib ki, layihənin həyata keçirilməsi nəticəsində hüquqi məlumatlara çıxış imkanları genişlənəcək, hüquqi savadlılıq artacaq və hüquqi xidmətlərin rəqəmsallaşdırılması istiqamətində mühüm addım atılmış olacaq.

Layihənin bir il ərzində həyata keçirilməsi nəzərdə tutulur. Bu müddət ərzində platformanın texniki imkanlarının genişləndirilməsi, hüquqi xidmətlərin inkişaf etdirilməsi və istifadəçi auditoriyasının əhəmiyyətli dərəcədə artırılması planlaşdırılır.

Nahid Qurbanov sonda bildirib ki, InterPress.ge uzun illərdir Gürcüstanda yaşayan insanların informasiya ehtiyaclarının qarşılanmasına xidmət edir və yeni layihə də bu missiyanın davamı olaraq hüquqi xidmətlər sahəsində insanların həyatını asanlaşdırmağa yönəlib.

"Bizim məqsədimiz sadəcə informasiya vermək deyil. İnsanların gündəlik həyatında qarşılaşdığı real problemlərin həllinə töhfə vermək istəyirik. Bu layihə də həmin məqsədin bir hissəsidir və inanırıq ki, gələcəkdə minlərlə insanın hüquqi xidmətlərə daha rahat çıxış əldə etməsinə kömək edəcək", – deyə InterPress.ge rəhbəri Nahid Qurbanov əlavə edib.