Kürdə 14 günlük axtarış başa çatdı: Çaya düşən avtomobilin sürücüsünün meyiti tapıldı

İyunun 2-də Tbilisidə baş vermiş yol-nəqliyyat hadisəsi zamanı Kür çayına düşən avtomobilin sürücüsünün meyiti 14 gün davam edən intensiv axtarışlardan sonra tapılıb.

InterPress.ge xəbər verir ki, bu barədə Gürcüstanın Fövqəladə Halların İdarə Olunması Xidməti məlumat yayıb. Qurumun açıqlamasına əsasən, Tbilisi və Rustavi şəhərləri ərazisində, Kür çayının sahilləri boyunca aparılan axtarış-xilasetmə əməliyyatları 24 saat fasiləsiz rejimdə həyata keçirilib.

Məlumata görə, yanğınsöndürən-xilasedicilər 14 gün ərzində davam edən fasiləsiz axtarış tədbirləri nəticəsində iyunun 2-də baş vermiş qəza zamanı Kür çayına düşən avtomobilin sürücüsünün meyitini aşkar ediblər.

Bildirilib ki, əməliyyatlara hər gün Fövqəladə Halların İdarə Olunması Xidmətinin 100-dən çox əməkdaşı, dalğıc qrupları, həmçinin xüsusi texnika və peşəkar avadanlıqlarla təchiz edilmiş xilasedicilər cəlb olunub.

Qurumdan verilən məlumata əsasən, meyit artıq sudan çıxarılıb və faktla bağlı qanunvericiliyə uyğun zəruri hüquqi prosedurlar həyata keçirilir.