Tbilisidə qətl və yaralanma hadisəsi – bir nəfər ölüb, bir nəfər xəstəxanaya yerləşdirilib

Tbilisinin Kurdiani küçəsində baş verən insident nəticəsində bir nəfər ölüb, bir nəfər isə yaralanıb.

InterPress.ge xəbər verir ki, "TV Pirveli"nin yaydığı məlumata görə, həyatını itirən şəxs gənc kişidir. İlkin ehtimallara əsasən, o, yaşayış binasının yeddinci mərtəbəsindən atılıb. Yaralanan kişi isə tibbi müəssisəyə aparılıb.

Məlumata görə, hadisə ötən gecə mərhumun yaşadığı evdə baş verib. Həmin vaxt mənzildə bir neçə nəfər olub.

Yerli sakinlərin sözlərinə görə, onlar hadisə zamanı atəş və dava səsləri eşidiblər.

Hazırda hadisə yerində ekspert-kriminalistlər işləyirlər.

Gürcüstan Daxili İşlər Nazirliyindən bildirilib ki, faktla bağlı Gürcüstan Cinayət Məcəlləsinin 236-cı və 19-109-cu maddələri ilə istintaq aparılır. Bu maddələr qanunsuz olaraq odlu silah əldə etmə, saxlama və gəzdirmə, həmçinin iki və ya daha çox şəxsə qarşı ağırlaşdırıcı hallarda qəsdən adam öldürməyə cəhd faktlarını nəzərdə tutur.

Nazirlikdən verilən məlumata görə, insidentdə iştirak etmiş bütün şəxslər artıq müəyyən edilib və hazırda polis bölməsindədirlər.