Gürcüstanda sərnişin daşıyan nəqliyyat vasitələri üçün yeni tələblər tətbiq olunacaq
2027-ci il martın 1-dən etibarən ölkədaxili müntəzəm sərnişindaşıma həyata keçirən nəqliyyat vasitələrinin mərhələli şəkildə taxoqraf və sürət məhdudlaşdırıcı qurğularla təchiz edilməsi məcburi olacaq.
InterPress.ge xəbər verir ki, bu barədə Baş nazirin hökumət proqramının icrası ilə bağlı parlamentə təqdim etdiyi hesabatda qeyd olunub.
Sənədə əsasən, hesabat dövründə şəhərlərarası sərnişindaşıma və avtovağzalların islahatı davam etdirilib. Bu çərçivədə ölkədaxili müntəzəm sərnişindaşıma ilə məşğul olan şəxslərin lisenziyalaşdırılması və avtovağzalların sertifikatlaşdırılması prosesi həyata keçirilir.
Hökumətin məlumatına görə, yeni tələblərin məqsədi sərnişinlərin təhlükəsizliyinin artırılması, yol-nəqliyyat hadisələrinin sayının azaldılması, yol hərəkəti təhlükəsizliyinin inkişaf etdirilməsi və avtomobil nəqliyyatı sahəsində rəqabətli mühitin yaradılmasıdır.
Bundan əlavə, nəqliyyat vasitələrinin dövri texniki baxışı sahəsində dövlət nəzarətinin səmərəliliyinin artırılması məqsədilə 2025-ci ilin iyun ayından etibarən texniki baxış prosesinin monitorinqi aktiv şəkildə aparılır.
Hesabatda həmçinin qeyd olunur ki, texniki baxış islahatı çərçivəsində L kateqoriyasına aid nəqliyyat vasitələrinin – motosikletlərin, trisikl və kvadrosikllərin məcburi dövri texniki baxışdan keçirilməsi ilə bağlı normativ-hüquqi aktların layihələri hazırlanır.
