Həbsxanadan qalmaqallı mesaj: Xoştariya beynəlxalq tərəfdaşlara müraciətə çağırdı
"Droa" Partiyasının lideri Elene Xoştariya həbsxanadan verdiyi telefon müsahibəsində polis sisteminin demoralizasiya olunduğunu, siyasi spektrin isə deqradasiyaya uğradığını iddia edərək, müxalifətin beynəlxalq tərəfdaşlarla koordinasiyalı fəaliyyət göstərməsinin vacibliyini bildirib.
InterPress.ge xəbər verir ki, Elene Xoştariya bu fikirləri müxalif yönümlü media orqanlarından birinə həbsxanadan telefonla verdiyi müsahibə zamanı səsləndirib. O, həmçinin azad və ədalətli seçkilər keçirilənədək hakim partiya tərəfdarlarına qarşı sosial təzyiq və sosial təcrid kampaniyasının davam etdirilməsinin tərəfdarı olduğunu bildirib.
"Əgər hakim partiyanın tərəfdarı restorana gəlsə, ona deyərəm ki, bilirsiniz nə var? Azad və ədalətli seçkilər keçirilənə qədər siz bu xinkalini yeyə bilməyəcəksiniz. İstənilən halda, sosial təzyiqimiz, sosial təcridimiz, mövqeyimizi və iradəmizi ifadə etməyin bütün formaları bir məqsədə xidmət etməlidir – azad və ədalətli seçkilər keçirilənə qədər heç nə əvvəlki kimi olmayacaq", – deyə Xoştariya bildirib.
O bildirib ki, payız aylarınadək yüz minlərlə insanın etiraz aksiyalarına qoşulacağını gözləyir. Xoştariyanın sözlərinə görə, polis sisteminin demoralizasiyası və siyasi spektrin deqradasiyası fonunda müxalifət beynəlxalq tərəfdaşlara müraciət etməlidir.
"Bu ictimai şüurun formalaşması başa çatdıqda düşünürəm ki, bu, çox vaxt aparmayacaq və payızadək belə olacaq. Bu fonda, polis demoralizə olunarkən və bütün siyasi spektr deqradasiyaya uğrayarkən tərəfdaşlarımıza deməliyik: 'Dostlar, biz nə etmək lazım olduğunu bilirik. Bütün müxalifət, həbs olunan, döyülən insanlar və küçələrə çıxan 300 min insan var. Sizdən xahiş edirik ki, müəyyən ediləcək tədbirlərlə koordinasiyalı təzyiq göstərəsiniz. Hər kəs bilməlidir ki, biz bu kulminasiya nöqtəsinə doğru irəliləyirik'", – deyə Elene Xoştariya vurğulayıb.
