Beka Çxaidze: Niko Xurtsilava azadlığa buraxılmalıdır

Müğənni Beka Çxaidze sosial şəbəkədə yayımladığı videomüraciətdə Onişe Oqriaşviliyə hücum etməkdə təqsirləndirilən Niko Xurtsilava ilə bağlı danışıb.

InterPress.ge xəbər verir ki, Çxaidze bildirib ki, Nodar Dumbadzenin, Gürcü Pravoslav Kilsəsinin və Gürcüstan krallarının təhqir olunması maliyyələşdirilən və məqsədyönlü şəkildə aparılan təbliğatdır.

“Əvvəlcə bütün qəlbimlə mələk kimi bir oğlanın ailəsinə başsağlığı vermək istəyirəm. Sözlə ifadə olunmayacaq qədər böyük faciə baş verib. Allah ona əbədi cənnət nəsib etsin.

Niko Xurtsilavaya gəlincə, hamımız bu oğlanın yanında olmalıyıq. O, həbsdə qalmamalıdır. Ölkəmizin daha çox Niko Xurtsilava kimi oğullara ehtiyacı var. O, hər birimizin edəcəyi hərəkəti etdi. Həmin şərəfsiz, alçaq adamla qarşılaşdı və ona gürcü kişisinə yaraşan şəkildə, yalın əlləri ilə zərbə endirdi. O isə elə qışqırırdı ki, belə qışqırığı filmlərdə qadınlardan belə görməmişəm.

Mütləq bu oğlana dəstək olmalıyıq. Əminəm ki, o cəzalandırılmayacaq. Bu gün məsələ belə qoyulub: qanun və cəza, yoxsa Vətəninin ayaqlar altına atılmasına başını aşağı salıb baxmaq? Əlbəttə ki, biz heç vaxt kimliyimizin və dəyərlərimizin təhqir olunmasına dözməyəcəyik. Atalarımızın uğrunda can verdiyi dəyərləri qorumaq üçün bu oğlan da elə onlar kimi hərəkət etdi.

Əminəm ki, o azadlığa buraxılacaq. Amma bizim birliyimiz daha böyük əhəmiyyət daşıyır. Mənimlə razısınızsa və hesab edirsinizsə ki, bu oğlan həbsdə olmamalıdır, xahiş edirəm bu videonu paylaşın.

O dəyərsiz insanlara isə bir daha demək istəyirəm: bu çirkin əməllərdən əl çəkin. Heç kimə pul müqabilində bizim kimliyimizi, dəyərlərimizi və Vətənimizi satmağa imkan verməyəcəyik. Niko Xurtsilavaya dəstəyimizi göstərək və onun yanında olduğumuzu hamı görsün. Vətənimizə və hər birinizə uğurlar arzulayıram”, – deyə Beka Çxaidze videomüraciətində bildirib.