Gürcüstanda genişmiqyaslı antinarkotik əməliyyat: 121 nəfər saxlanıldı
Gürcüstanda hüquq-mühafizə orqanlarının ölkə üzrə keçirdiyi genişmiqyaslı antinarkotik əməliyyat nəticəsində narkotik cinayətləri ilə əlaqədar 121 nəfər saxlanılıb. Onlardan 59 nəfəri narkotik vasitələrin qanunsuz dövriyyəsi və satışı şəbəkəsində müxtəlif formalarda iştirak etməkdə ittiham olunur.
InterPress.ge xəbər verir ki, bu barədə Mərkəzi Kriminal Polis Departamentinin direktoru David Kiknadze keçirdiyi brifinqdə məlumat verib.
Onun sözlərinə görə, saxlanılanlar arasında həm Gürcüstan, həm də xarici ölkə vətəndaşları var.
David Kiknadze bildirib ki, məhkəmə qərarı əsasında polis əməkdaşları tərəfindən bir neçə dəfə narkotik vasitələrin nəzarətli alışı həyata keçirilib, əməliyyatlar gizli audio və video çəkilişlərlə sənədləşdirilib.
İstintaq çərçivəsində hüquq-mühafizə orqanları narkotik alverçilərinin ifşası məqsədilə onların adına göndərilən bağlamaları nəzarət altında dəyişdirərək, xüsusilə külli miqdarda narkotik vasitələri maddi sübut kimi götürüblər.
Saxlanılan şəxslərin üzərində, yaşayış yerlərində və avtomobillərində aparılan axtarışlar, eləcə də istintaq eksperimenti zamanı onların göstərdikləri ünvanlardan satış üçün hazırlanmış müxtəlif növ narkotik və psixotrop maddələr aşkar edilərək götürülüb.
Əməliyyat zamanı "Metadon", "Alfa-PVP", "Kokain", "Ketamin", "Buprenorfin", "Marixuana", çətənə (kannabis) bitkisi və digər narkotik vasitələr, həmçinin narkotiklərin qablaşdırılması üçün istifadə olunan materiallar, elektron tərəzilər və narkotik satışından əldə edildiyi ehtimal olunan pul vəsaitləri maddi sübut kimi müsadirə olunub.
Faktlarla bağlı Gürcüstan Cinayət Məcəlləsinin 260, 260³, 260⁴, 261 və 265¹-ci maddələri üzrə istintaq aparılır. Sözügedən maddələr 20 ilədək və ya ömürlük azadlıqdan məhrumetmə cəzasını nəzərdə tutur.
Brifinqdə qeyd olunub ki, Daxili İşlər Nazirliyi narkotik cinayətləri ilə mübarizəni qətiyyətlə davam etdirir. Rəsmi statistikaya əsasən, 2026-cı ilin ilk altı ayı ərzində narkotik cinayətləri ilə əlaqədar 5 minə yaxın şəxs cinayət məsuliyyətinə cəlb edilib. Onlardan 1000-ə yaxını narkotik vasitələrin qanunsuz satışı ilə məşğul olub.
Nazirliyin məlumatına görə, ötən ilin eyni dövrü ilə müqayisədə narkotik cinayətləri üzrə cinayət məsuliyyətinə cəlb olunan şəxslərin sayı 85 faiz artıb.
David Kiknadze vurğulayıb ki, Daxili İşlər Nazirliyi narkotik vasitələrin qanunsuz dövriyyəsi və satışı ilə məşğul olan şəxslərə qarşı gələcəkdə də qanunvericilikdə nəzərdə tutulan ən sərt tədbirləri tətbiq edəcək.
