Kənd təsərrüfatı, investisiya və ticarət sektorları üçün olan vergi ilə bağlı yenilik

Gürcüstanda bir sıra vergi güzəştlərinin qüvvədə qalma müddəti 2028-ci ilin 1 yanvarına qədər uzadılacaq. Güzəştlər kənd təsərrüfatı sektorunda çalışan şəxslərə, yerli və xarici investorların qiymətli kağızlardan əldə etdiyi gəlirlərə, səyyar ticarətə və daşınmaz əmlakın təchizatı ilə bağlı vergi qaydalarına şamil olunur.

InterPress.ge xəbər verir ki, hökumət parlamentə “Vergi Məcəlləsinə” dəyişiklik layihəsini təcili qaydada təqdim edib. Layihəyə əsasən, kənd təsərrüfatı istehsalı ilə məşğul olan şəxslərin və müəssisələrin ölkə daxilində istehsal etdikləri kənd təsərrüfatı məhsullarının ilkin satışından əldə etdikləri gəlir, illik dövriyyə 200 min lari həddini aşmadığı halda, gəlir və mənfəət vergisindən azad ediləcək.

Bundan əlavə, 2028-ci ilə qədər bu fəaliyyət çərçivəsində ödənilən əməkhaqqılara tətbiq edilən gəlir vergisi güzəşti də davam edəcək.

Layihə həmçinin, yerli hüquqi şəxslər üçün 2028-ci ilə qədər qüvvədə qalacaq güzəşti nəzərdə tutur. Belə ki, Milli Bank tərəfindən tanınan təşkilatlanmış bazarda ticarətə buraxılmış dövlət istiqrazlarından əldə edilən faiz gəlirləri gəlir vergisindən azad olacaq.

Hökumət həmçinin tütün xammalının idxalının vergidən azad edilməsini 2028-ci ilə qədər uzadır.

Eyni zamanda, qısa müddətli kirayə fəaliyyəti ilə məşğul olan fiziki şəxslər üçün də güzəşt qüvvədə qalacaq — belə şəxslər fiksə olunmuş gəlir vergisi ilə vergiyə cəlb olunacaqlar, əgər onların 12 ay ərzində dövriyyəsi 100 min larini keçməzsə və onlar əlavə dəyər vergisi ödəyicisi kimi qeydiyyatdan keçməyiblərsə.

Layihə investisiya qızılının təchizatı və idxalının ƏDV-dən azad edilməsini də nəzərdə tutur.

Bundan əlavə, 2028-ci ilə qədər qüvvədə qalacaq qaydaya əsasən, daşınmaz əmlakın təchizatı və onunla əlaqədar tikinti-montaj xidmətləri də müəyyən şərtlər daxilində ƏDV-dən azad olacaq.

Mal idxalı zamanı ƏDV-yə əsas götürülən dəyərin hesablanma qaydası da dəyişməz qalacaq – bu zaman əsas komponent kimi malların gömrük dəyərinə yalnız idxal rüsumları əlavə ediləcək (ƏDV istisna olmaqla).