Son onilliklərdə 13 mindən çox gürcüstanlı tələbə və akademik Erasmus+ proqramı çərçivəsində Avropada təhsil alıb və təlim keçib

Son onilliklər ərzində 13 mindən çox tələbə və akademik heyət üzvü Erasmus+ proqramı vasitəsilə Avropanın müxtəlif ölkələrində təhsil alıb və təlimlərdə iştirak edib.

InterPress.ge xəbər verir ki, bu barədə Gürcüstandakı Avropa İttifaqı Nümayəndəliyinin yaydığı məlumatda qeyd olunub.

Açıqlamada qeyd olunur ki, proqram iştirakçılarının səfər, təhsil və yaşayış xərcləri tam şəkildə Avropa İttifaqı tərəfindən maliyyələşdirilib.

“Bu mübadilə proqramları gürcüstanlı gənclərə təhsil və innovasiyalar sahəsində yeni imkanlar açdı, onlara yeni bacarıqlar, perspektivlər və karyera imkanları qazandırdı. Erasmus Mundus proqramı çərçivəsində birgə magistratura təqaüdü ilə 290 gürcüstanlı tələbə Avropanın aparıcı universitetlərində təhsil alıb, bu da onların akademik və peşəkar inkişafına töhfə verib”, – məlumatda bildirilir.

Bundan əlavə, 22 mindən çox gürcüstanlı gənc Avropa İttifaqı tərəfindən maliyyələşdirilən təhsil mübadilələrində, mədəni layihələrdə və təlim proqramlarında iştirak edib. Bu təşəbbüslər gənclər arasında dialoqu, iştirakı və ümumi Avropa dəyərlərinin paylaşılmasını gücləndirib.

Məlumatda həmçinin vurğulanır ki, Avropa İttifaqına üzv olmayan tərəfdaş ölkələr arasında Gürcüstan Erasmus+ proqramı üzrə tələbə və mütəxəssis mobilliyinə görə 4-cü yerdə qərarlaşıb. Bu da gürcüstanlı vətəndaşların Avropada bilik və təcrübə qazanmaq istəyinin bariz göstəricisidir.