Kobaxidzedən açıqlama: Gürcüstan 2026–2035-ci illəri əhatə edən 10 illik inkişaf strategiyasının hazırlanmasına başlayır

"Ölkə 2026–2035-ci illəri əhatə edən milli inkişaf strategiyasının hazırlanmasına başlayır."

InterPress.ge xəbər verir ki, bu barədə Gürcüstanın Baş naziri İrakli Kobaxidze hökumətin iclasında bildirib.

Onun sözlərinə görə, bu sənəd qısa və konkret olmalı, ölkənin inkişafı üçün lazım olan dəqiq məqsədləri, vəzifələri və onların yerinə yetirilmə müddətlərini əks etdirməlidir.

“İstəyirik, ölkənin bütün istiqamətlər üzrə inkişafını müəyyən edən bir sənəd hazırlayaq. Mənim fikrimcə, bu sənəd qısa, lakin çox konkret olmalıdır. Burada ölkənin inkişafı üçün əsas məqsədlər və onların icra müddətləri qeyd olunacaq. Ətraflı məlumat ictimaiyyətə daha sonra təqdim ediləcək. Fikrimiz budur ki, yaxın vaxtlarda bu sənəd üzərində işi yekunlaşdıraq, onu ictimaiyyətə təqdim edək və gələcək illərdə ölkəmizin ardıcıl və sabit inkişafını təmin edəcək aydın yol xəritəsini əldə edək. Bu gündən etibarən bu istiqamətdə işə başlamaq vacibdir ki, gələcək fəaliyyətimiz üçün keyfiyyətli bir bələdçi sənəd yaradaq,” – deyə Kobaxidze vurğulayıb.

Baş nazirin sözlərinə görə, bu strategiya Gürcüstanın iqtisadi, sosial və institusional inkişafının əsas istiqamətlərini müəyyən edəcək və gələcək dövlət proqramlarının planlaşdırılmasında baza rolunu oynayacaq.