Avropa Komissarı: “Gürcüstan hökuməti öz xalqını dinləmir və Avropa yoluna çıxmaq istəmir”

Avropa İttifaqının genişlənmə məsələləri üzrə komissarı Marta Kos bəyan edib ki, Gürcüstan hökuməti öz xalqının səsini eşitmir və Avropa istiqamətində hərəkət etməyə maraqlı deyil.

InterPress.ge xəbər verir ki, Kos bu barədə Lüksemburqda keçirilən Aİ Xarici İşlər Şurasının iclası öncəsi jurnalistlərə açıqlama verib.

“Biz Gürcüstanda baş verən narahatedici prosesləri müzakirə edəcəyik. Gürcüstan xalqı son üç seçkidə, davam edən etiraz aksiyalarında və ictimai sorğularda açıq şəkildə göstərib ki, onlar Avropa gələcəyi istəyirlər. Amma görünür ki, onların hökuməti xalqını dinləmir və Avropa yolunu seçmək istəmir. Müxalifət nümayəndələri həbs olunur, jurnalistlərin və vətəndaş cəmiyyəti təşkilatlarının səsləri isə boğulur,” – deyə Marta Kos bildirib.

O, həmçinin qeyd edib ki, hakimiyyət nümayəndələri Aİ-yə qarşı dezinformasiya kampaniyalarının yayılmasına dəstək verirlər:

“Biz bu saxta narrativləri və Avropa institutlarına, onların nümayəndələrinə və üzv dövlətlərimizə qarşı bütün hücumları qətiyyətlə pisləyirik. Gürcüstan hökumətini çağırırıq ki, öz xalqını dinləsin, cəmiyyətə açıq olsun, vətəndaş sektoru ilə dialoqa girsin və xalqın istəyinə uyğun olaraq Avropanın bir hissəsinə çevrilsin,” – deyə Aİ komissarı vurğulayıb.