Azərbaycanın quru sərhədlərinin açılması ilə bağlı açıqlama verildi
“Nə qədər pandemiya var, o qədər karantin rejimi davam edəcək. Karantin rejimi pandemiya ilə mübarizə aparmaq üçün tədbirlər kompleksidir. Ola bilər ki, karantin rejimi ləğv edilməsin, məhdudiyyətlər kiçik formada qalsın”.
InterPress.ge xəbər verir ki, bu sözləri mətbuata açıqlamasında tibb elmləri doktoru, professor Adil Qeybulla bildirib.
Professor hesab edir ki, quru sərhədlər və qapalı məkanlarla bağlı məhdudiyyətlər qüvvədə qala bilər:
“Bunlar hamısı epidemioloji vəziyyətdən asılıdır. Hər şey ləğv edilə də, sərtləşdirilə də bilər. Lakin sərtləşdirmələrin olacağını düşünmürəm. Ümumdünya Səhiyyə Təşkilatı (ÜST) nə qədər ki, pandemiyanın sonunu elan etməyib, o qədər karantin rejimi qalacaq.
Hesab edirəm ki, pandemiya sonuna, öz qürubuna doğru gedir. Azərbaycan reallığında kollektiv immunitetin formalaşması ağır nəticələrə səbəb olacaq xüsusi dalğaların yaranmasını da mümkün etmir. Avqust-sentyabr aylarında yoluxmalar zamanı da gördük ki, ölüm və ağırlaşma sayı xeyli aşağı olub. Bu vəziyyət virusun zəiflədiyini və pandemiyanın sona doğru getdiyini göstərir”.
Eyni zamanda Operativ Qərargahın üzvü, Milli Məclisin Səhiyyə Komitəsinin sədr müavini Rəşad Mahmudov quru sərhədlərlə bağı açıqlama verib.
"Quru sərhədlərlə bağlı qadağanın aradan qaldırılması ilə bağlı deyə bilərəm ki, bu məsələ Nazirlər Kabineti və Operativ Qərargahın səlahiyyətindədir. Yəqin ki, yaxın gələcəkdə bu məsələ ilə bağlı adiyyəti qurumlardan konkret qərarlar eşidəcəyik", - deyə o qeyd edib.
