Gürcüstanda 10 min lari dələduzluqda ittiham olunan vəkil saxlanılıb

Gürcüstan Daxili İşlər Nazirliyinin Baş Müfəttişlik Departamentinin əməkdaşları həyata keçirilən əməliyyat tədbirləri və istintaq hərəkətləri nəticəsində dələduzluq ittihamı ilə bir vəkili saxlayıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb.

Nazirliyin məlumatına görə, kompleks tədbirlər, o cümlədən gizli istintaq hərəkətləri nəticəsində müəyyən edilib ki, vəkil müdafiə etdiyi məhkumun bacısından aldadaraq 10 000 lari tələb edib. O, qadına bildirib ki, guya həmin pulu Daxili İşlər Nazirliyinin Mərkəzi Kriminal Polis Departamentinin əməkdaşlarına verəcək və bunun müqabilində qardaşının işi üzrə prosessual sazişin bağlanması məsələsini həll etdirəcək.

Bundan əlavə, vəkil məhkumun bacısından daha 100 000 lari tələb edib. O, qadını aldadaraq bildirib ki, bu məbləğin 40 000 larisi prokurorluğa verilməli, bunun müqabilində daha əlverişli şərtlərlə prosessual saziş bağlanmalı, qalan 60 000 lari isə dövlət büdcəsinə köçürülməlidir.

Məhkumun ailə üzvü məsələnin həlli üçün vəkilə 10 000 lari verib.

Hüquq-mühafizə orqanlarının əməkdaşları vəkili təqsirləndirilən şəxs qismində saxlayıblar.

Faktla bağlı Gürcüstan Cinayət Məcəlləsinin 180-ci maddəsinin ikinci hissəsi ilə istintaq aparılır. Həmin maddə 7 ilədək müddətə azadlıqdan məhrumetmə cəzasını nəzərdə tutur.