Gürcüstanda enerji tarifləri yenilənir: qaz sabit qalır, elektrik bahalaşır

Hazırkı mərhələdə təbii qaz tariflərinin artırılması ilə bağlı nə gözlənti, nə də əsaslar mövcuddur, yalnız çox minimal korreksiya mümkündür. Tarif artımı isə elektrik enerjisinə şamil olunacaq.

InterPress.ge xəbər verir ki, bu barədə Gürcüstanın Energetika və Su Təchizatı üzrə Milli Tənzimləmə Komissiyasının (GNERC/Semek) sədri David Narmania “Media Center Mtavari”nin mətbuat klubunda çıxışı zamanı məlumat verib.

Onun sözlərinə görə, tariflərlə bağlı yekun qərar dekabrın 29-da keçiriləcək komissiya iclasında qəbul ediləcək. Narmania bildirib ki, ilin sonunda tənzimləyici qurum elektrik enerjisi üzrə istehlak tariflərini yenidən hesablamalıdır. Qeyd olunub ki, son iki il ərzində istehlak tarifləri ümumilikdə 3 tetri azaldılıb və yeni tariflər məhz dekabrın 29-da müəyyən ediləcək.

Komissiya sədrinin sözlərinə görə, hazırda həm elektrik enerjisi, həm də təbii qaz tariflərinə yenidən baxılması prosesi davam edir. Bununla belə, təbii qaz üzrə ciddi artım gözlənilmir, yalnız cüzi dəyişiklik istisna edilmir. Elektrik enerjisi tariflərində isə artım nəzərdə tutulur, lakin konkret rəqəmlər və faiz göstəriciləri hələlik açıqlanmır, çünki məsələ üzərində gündəlik rejimdə iş aparılır.

David Narmania eyni zamanda tənzimləyici komissiyanın istehlakçılar üçün mühüm nəticələr doğuran qərarlarına da diqqət çəkib. Onun sözlərinə görə, il ərzində səhv hesablanmış ödənişlər və köhnəlmiş borclarla bağlı daxil olan müraciətlər əsasında reaksiya verilib və bu çərçivədə istehlakçıların xeyrinə ümumilikdə təxminən 1 milyon lari məbləğində vəsait silinib.

Bundan əlavə, komissiya tərəfindən müəyyən edilmiş qaydaların və müddətlərin pozulmasına görə sistem avtomatik şəkildə istehlakçılara kompensasiyalar hesablayıb. Nəticədə, il ərzində kommunal şirkətlərin istehlakçılara ödəməli olduğu kompensasiyaların ümumi həcmi 5,7 milyon laridən çox olub.