Gürcüstanda iki nəfər qadını biznes qurmaq vədi ilə aldadaraq 116 min laridən çox pulunu mənimsəyib

Gürcüstanda tanıdıqları qadına birgə biznes qurmağı təklif edərək ondan 116 475 lari alan iki nəfər saxlanılıb. İstintaqın məlumatına görə, qadın biznes planını həyata keçirmək üçün banklardan kredit götürüb və həmin məbləği təqsirləndirilən şəxslərə verib. Lakin onlar razılaşdırılmış şərtləri yerinə yetirməyərək pulu mənimsəyiblər.

InterPress.ge xəbər verir ki, Gürcüstan Daxili İşlər Nazirliyinin İmereti Polis Departamentinin Kutaisi Şəhər İdarəsinin əməkdaşları qabaqcadan əlbir olan bir qrup tərəfindən törədilmiş və əhəmiyyətli zərərlə nəticələnən dələduzluq ittihamı ilə iki nəfəri Batumidə saxlayıblar.

İstintaqla müəyyən edilib ki, təqsirləndirilən şəxslər tanıdıqları qadına birgə biznes fəaliyyətinə başlamağı təklif ediblər. Planı həyata keçirmək məqsədilə qadın bank kreditləri götürərək ümumilikdə 116 475 larini onlara verib.

Lakin təqsirləndirilən şəxslər razılaşdırılmış şərtlərə əməl etməyib və aldıqları pulu qanunsuz olaraq mənimsəyiblər.

Hər iki şəxs məhkəmə qərarı əsasında Batumidə saxlanılıb.

Faktla bağlı Gürcüstan Cinayət Məcəlləsinin 180-ci maddəsinin ikinci hissəsi ilə istintaq aparılır. Həmin maddə 7 ilədək azadlıqdan məhrumetmə cəzasını nəzərdə tutur.