İrakli Kobaxidze: “Avropa İttifaqı ilə siyasi səviyyədə açıq və ictimai dialoqa başlamağı təklif edirik”

Gürcüstanın Baş naziri İrakli Kobaxidze Avropa İttifaqı ilə münasibətlərin yaxşılaşdırılması üçün hər iki tərəfin addım atmalı olduğunu və siyasi səviyyədə açıq dialoqa başlanmasını təklif etdiklərini bildirib.

InterPress.ge xəbər verir ki, Kobaxidze Siyasi Şura və parlament çoxluğunun iclasından sonra Avropa İttifaqı ilə münasibətlərə dair jurnalistlərin sualını cavablandırarkən noyabrda açıqlanacaq genişlənmə hesabatından yeni gözləntilərinin olmadığını deyib. Onun sözlərinə görə, Avropa Komissiyasının yanaşmasında əsaslı dəyişiklik müşahidə olunmur.

“Yəqin ki, yeni hesabat da oxşar olacaq. Çünki Avropa Komissiyasının yanaşmasında hər hansı əsaslı dəyişiklik görmürük və bu, çox təəssüf doğurur. İkili standartların və gürcü xalqına qarşı ədalətsiz münasibətin olduğunu görürsünüz. Hələlik bunlar dəyişməyib. Buna görə də hər hansı yaxşılaşma gözləmirik. Bu, təəssüf doğuran reallıqdır.

Hər iki tərəf addımlar atmalıdır və bizim çox aydın, sadə təklifimiz var: gəlin, dialoqa başlayaq. Bizim təsəvvürümüzə görə, bu dialoq siyasi səviyyədə aparılmalıdır. Nəticə etibarilə, qərarları hər iki tərəfdə siyasətçilər qəbul edirlər. Buna görə də dialoqun siyasi səviyyədə başlanması prinsipial əhəmiyyət daşıyır.

Bizim üçün digər prinsipial və vacib məsələ isə dialoq və müzakirələrin Gürcüstan cəmiyyəti üçün açıq və ictimai olmasıdır. Təklifimiz budur. Düşünürəm ki, bu, tamamilə ideal təklifdir. Dialoq olmadan heç bir məsələ həll edilə bilməz. Bu təklifimizə niyə müsbət cavab verilməməli olduğunu anlamırıq. Əgər münasibətlərin sağlamlaşdırılması istəyi varsa, Avropa qurumlarının nümayəndələri təklifimizlə asanlıqla razılaşmalıdırlar. Çünki dialoqun heç bir mənfi tərəfi ola bilməz”, – deyə Kobaxidze bildirib.