Nepal və Tibetdə daşqın və torpaq sürüşmələri nəticəsində 1 500 nəfər itkin düşüb

Nepal və Tibet bölgəsində baş verən daşqın və torpaq sürüşmələri nəticəsində 1 500 nəfər, o cümlədən ən azı 800 əcnəbi itkin düşüb.

InterPress.ge xəbər verir ki, bu barədə yerli hakimiyyət orqanlarına istinadən “Reuters” məlumat yayıb.

Hazırda əldə olunan məlumatlara görə, təbii fəlakətlər nəticəsində ölənlərin sayı 165-i ötüb.

“Bu rəqəm artacaq, çünki axtarışları yenidən başladıq və daha çox cəsəd tapacağımız gözlənilir”, - deyə polis nümayəndəsi Abi Narayan Kafle “Reuters”ə bildirib.

Polis və turizm rəsmilərinin məlumatına görə, Nepalda itkin düşən 826 nəfərin təxminən 600-ü əcnəbidir.

Çinin dövlət televiziyası CCTV-nin məlumatına əsasən, Tibetin Girong rayonunda 558 nəfər itkin düşüb. Onlardan 260-ı xarici ölkə vətəndaşıdır.

Nepal ordusunun mətbuat katibi Raca Ram Basnet bildirib ki, ən çox zərər çəkmiş ərazilərə helikopterlərlə çadır, ərzaq və digər təcili yardım ləvazimatları çatdırılır.

Xilasetmə işlərinə 5 000-dən çox hərbçi və polis əməkdaşı cəlb olunub. Onlar həm sağ qalanların, həm də həlak olanların axtarışını davam etdirirlər.