İrakli Kirçxaliya: “Milli Hərəkat” və onun müttəfiqləri, QHT-lər və ayrı-ayrı şəxslər nə 2008-2012-ci illərdə, nə də bu gün müstəqildirlər
Parlament çoxluğunun lideri İrakli Kirçxaliya sosial şəbəkədə paylaşım edib. O, “Milli Hərəkat” və onun müttəfiqləri, QHT-lər, eləcə də vətəndaş fəallığının və ya elmi sahənin arxasında gizlənən ayrı-ayrı şəxslərin müstəqil olmadığını bildirib.
InterPress.ge xəbər verir ki, Kirçxaliyanın sözlərinə görə, bu şəxslər “xarici tapşırıqları sözsüz yerinə yetirən, manevr imkanları qalmamış agentlər və itaətkar qullardır”.
Onun sözlərinə görə, peşəsindən asılı olmayaraq, Gürcüstanda xarici maraqlara xidmət edən çoxsaylı insanlar var və bunun bariz nümunəsi avqust müharibəsindən sonra Rusiyada sərbəst şəkildə fəaliyyət göstərən, Ukraynada müharibə başladıqdan sonra isə rusofob olan mədəniyyət xadimlərinin geniş siyahısıdır.
“Bu insanlara niyə Rusiyaya qarşı 2008-ci ilin avqustundan sonra deyil, məhz indi fəallaşmaq tapşırığının verildiyi də aydındır. Qlobal müharibə partiyasına Rusiyanın qarşıdurmasına Avropanı cəlb etmək üçün bu gün davam edən müharibənin miqyası lazım idi. Bu isə öz növbəsində konkret cəmiyyətlərdə, xüsusilə də Gürcüstanda anti-Rusiya əhval-ruhiyyəsinin qızışdırılmasını və qeyd olunan ideyanın dəstəklənməsi üçün səfərbərliyin təmin edilməsini zəruri edirdi. ‘Dərin dövlət’in qeyd olunan planında Gürcüstanın nə üçün mühüm rol oynaya biləcəyini təhlil etmək üçün yalnız ölkəmizin coğrafi mövqeyini və tarixi kontekstini dərk etmək kifayətdir.
Baş nazir xarici qüvvələrin agentlərinə çevrilmiş yerli siyasətçilərin və sözdə vətəndaş cəmiyyəti nümayəndələrinin hansı model üzrə fəaliyyət göstərdiyini çox yaxşı izah edib. Lakin yuxarıda qeyd olunan modelə yalnız onlar deyil, müxtəlif sahələrin nümayəndələri də tam şəkildə uyğun gəlirlər. Bu isə təsdiqləyir ki, peşəsindən asılı olmayaraq, ölkəmizdə xarici maraqlara xidmət edən çoxsaylı insanlar var.
Bunun ən yaxşı nümunəsi isə 2008-2022-ci illərdə Rusiyada fəaliyyət göstərməkdən və oradakı layihələrdə iştirak etməkdən çəkinməyən, lakin Ukraynada müharibə başlayandan bu günə qədər ritorikası və fəaliyyətləri xüsusilə anti-Rusiya xarakteri alan həmin sözdə mədəniyyət xadimlərinin geniş siyahısıdır”, – deyə Kirçxaliya yazıb.
