Levan Maxaşvili: ATƏT-in 57 üzvündən 34-ü Gürcüstanla bağlı "Moskva Mexanizmi"nin tətbiqini dəstəkləməyib

Gürcüstan parlamentinin Avropaya İnteqrasiya Komitəsinin sədri Levan Maxaşvili ATƏT Parlament Assambleyasının Siyasi Məsələlər və Təhlükəsizlik Komitəsinin 33-cü illik sessiyasında çıxışı zamanı bildirib ki, təşkilata üzv 57 dövlətdən 34-ü, o cümlədən ABŞ, Gürcüstanla bağlı "Moskva Mexanizmi"nin tətbiqini dəstəkləməyib.

InterPress.ge xəbər verir ki, Maxaşvilinin sözlərinə görə, bu göstərici üzv dövlətlərin təxminən 60 faizini təşkil edir.

O qeyd edib ki, Gürcüstan ATƏT-lə vicdanla əməkdaşlıq etsə də, "Moskva Mexanizmi" çərçivəsində hazırlanmış hesabatın nəticələrini qəbul edə bilməz və bunun səbəbləri müxtəlif beynəlxalq platformalarda dəfələrlə izah olunub.

Maxaşvili bildirib ki, təqdim olunan qətnamə layihəsində narahatedici tendensiya müşahidə olunur. Onun sözlərinə görə, hesabatda yalnız iddia kimi göstərilən məqamlar qətnamə layihəsində təsdiqlənmiş fakt kimi təqdim edilir.

Xüsusilə, layihənin 20-ci bəndində zorakılığın guya "işgəncə həddinə çatdığı" barədə ifadənin yer almasının ciddi narahatlıq doğurduğunu deyən komitə sədri vurğulayıb ki, belə bir ifadə "Moskva Mexanizmi" hesabatında ümumiyyətlə yoxdur.

Maxaşvili bu cümlənin qətnamə layihəsinin 20-ci bəndindən çıxarılmasına çağıraraq bildirib ki, həmin ifadə hesabatın mətninə uyğun gəlmir və onun siyasi şərhidir.

O, həmçinin qeyd edib ki, hər bir suveren dövlət kimi Gürcüstanın da seçki prosesini, siyasi sistemini və sosial-iqtisadi sabitliyini xarici müdaxilələrdən qorumaq üçün hüquqi mexanizmlər yaratmaq hüququ var.

Maxaşvilinin sözlərinə görə, hər hansı qanunla bağlı narazılıq yaranarsa, bunun düzgün yolu qanunun hüquqi qaydada mübahisələndirilməsi və məhkəməyə müraciət edilməsidir.

O əlavə edib ki, "Şəffaflıq haqqında" qanun hazırda həm Gürcüstan Konstitusiya Məhkəməsində, həm də Avropa İnsan Hüquqları Məhkəməsində baxılır və hüquqi qiymətləndirmə məhz məhkəmələr tərəfindən verilməlidir.

Levan Maxaşvili beynəlxalq təşkilatların qısamüddətli siyasi məqsədlər üçün istifadə edilməsinin yolverilməz olduğunu vurğulayaraq, bütün tərəfləri siyasi etiketlərdən çəkinməyə və hüquqi məsələlərin məhkəmələr tərəfindən həll olunmasına hörmətlə yanaşmağa çağırıb.