Droa Partiyası: Kvemo Kartlidə İranın təsirinin artması narahatedici həddə çatıb
“Droa” Partiyası Kvemo Kartli bölgəsində İranın siyasi, ideoloji və əməliyyat xarakterli təsirinin gücləndiyi barədə bəyanat yayıb. Partiya hesab edir ki, bölgədə İranla əlaqəli şəbəkələrin genişlənməsi Gürcüstanın milli təhlükəsizliyi üçün ciddi risklər yaradır.
InterPress.ge xəbər verir ki, partiyanın yaydığı bəyanatda Kvemo Kartlidə İranın təsirinin narahatedici səviyyəyə çatdığı və bu prosesin hakimiyyət tərəfindən bilərəkdən dəstəkləndiyi iddia olunur.
Bəyanatda qeyd edilir ki, Marneulidə çəkilmiş videogörüntülərdə İranın ali dini lideri Ayətullah Əli Xameneinin posterinin əks olunduğu və üzərində "Həzrət Ayətullah Xamenei, dünyanın məzlumlarının lideri və azadlığın səsi" sözlərinin yazıldığı görünür. Partiyanın iddiasına görə, videoda bir qrup gənc həmin posterin qarşısında dini mərasim icra edir.
“Droa”nın bəyanatında bildirilir ki, oxşar hallar Qardabani bələdiyyəsində də müşahidə olunur və bölgədə uşaqların və gənclərin ideoloji təsir altına salınması, radikallaşdırılması və cəlb olunması üçün sistemli mexanizmlər fəaliyyət göstərir.
InterPress.ge xəbər verir ki, partiya İranın Gürcüstandakı təsirinin artmasının ölkənin ABŞ ilə strateji tərəfdaşlığına da mənfi təsir göstərdiyini iddia edib. Bəyanatda qeyd olunur ki, ABŞ-Gürcüstan münasibətlərinin normallaşması üçün ölkənin xarici zərərli təsirlərdən azad olunması vacib şərtlərdən biri hesab edilir.
Partiya həmçinin Gürcüstan hakimiyyətini İran, Rusiya və Çinlə bağlı təsir şəbəkələrinin fəaliyyətinə qarşı yetərli tədbirlər görməməkdə ittiham edib.
“Droa”nın bəyanatında vurğulanır ki, ölkənin təhlükəsizlik sistemi real təhdidlərin aradan qaldırılmasına deyil, siyasi rəqiblərin təqibinə yönəldilib. Partiya mövcud vəziyyətin dəyişməsi üçün siyasi hakimiyyət dəyişikliyinin zəruri olduğunu bildirir.
Qeyd edək ki, bəyanatda səsləndirilən iddialar “Droa” Partiyasının mövqeyini əks etdirir. Məsələ ilə bağlı Gürcüstan hakimiyyəti tərəfindən hələlik rəsmi münasibət bildirilməyib.
