Qoridə polis əməkdaşlarının zorakılığı ilə bağlı altı nəfər saxlanılıb

Gürcüstan Prokurorluğu Qoridə polis əməkdaşları tərəfindən xidməti səlahiyyətlərin zor tətbiq etməklə aşılması faktı üzrə altı nəfərin saxlanıldığını açıqlayıb.

InterPress.ge xəbər verir ki, bu barədə məlumat prokurorluğun yaydığı bəyanatda əks olunub.

Bildirilib ki, Şida Kartli və Mtsxeta-Mtianeti dairə prokurorluğunun istintaq idarəsi tərəfindən Gürcüstan Daxili İşlər Nazirliyinin Baş İnspeksiyası ilə koordinasiyalı şəkildə aparılan istintaq nəticəsində müəyyən olunub ki, 2026-cı il mayın 27-də Qori şəhərində təqsirləndirilən şəxslər zərərçəkmişin saxlanılması zamanı zor tətbiq etməklə xidməti səlahiyyətlərini aşıblar.

Prokurorluğun məlumatına görə, tətbiq edilən zorakılıq nəticəsində zərərçəkmiş şəxsin hüquqları ciddi şəkildə pozulub və onun sağlamlığına ziyan dəyib.

“Qısa müddətdə aparılmış istintaq nəticəsində əldə olunan sübutlar əsasında təqsirləndirilən şəxslər mayın 28-də saxlanılıblar. Onlara qanunvericilikdə nəzərdə tutulmuş müddətdə Gürcüstan Cinayət Məcəlləsinin 333-cü maddəsinin üçüncü hissəsinin “b” bəndi ilə ittiham irəli sürüləcək. Bu maddə zor tətbiq etməklə xidməti səlahiyyətlərin aşılmasını nəzərdə tutur və 5 ildən 8 ilədək azadlıqdan məhrumetmə cəzası ilə cəzalandırılır”, – deyə bəyanatda bildirilir.

Prokurorluq əlavə edib ki, yüksək ictimai maraq nəzərə alınaraq istintaqın gedişi barədə ictimaiyyətə vaxtaşırı məlumat veriləcək.