DİN vətəndaşlara xəbərdarlıq etdi

Gürcüstan Daxili İşlər Nazirliyi bildirib ki, bəzi vətəndaşlara Patrul Polisi Departamentinin adından saxta SMS bildirişləri göndərilir.

InterPress.ge xəbər verir ki, Daxili İşlər Nazirliyinin yaydığı məlumata görə, mesajlarda vətəndaşların guya yol hərəkəti qaydalarını, xüsusilə sürət həddini aşdıqları üçün cərimələndikləri qeyd olunur və SMS-lərə xüsusi keçid linki də əlavə edilir.

Nazirlik vətəndaşlara müraciət edərək bildirib ki, həmin mesajlar Patrul Polisi Departamenti tərəfindən göndərilməyib və insanları aldadıcı təlimatlara əməl etməməyə çağırıb.

“Məlumat vermək istəyirik ki, qeyd olunan mesajlar Patrul Polisi Departamenti tərəfindən göndərilməyib. Vətəndaşlardan xahiş edirik yanlış yönləndirilməsinlər və mesajda göstərilən təlimatları yerinə yetirməsinlər”, – deyə açıqlamada bildirilir.

DİN əlavə edib ki, əlavə məlumat almaq istəyən şəxslər Patrul Polisinin Vahid Xidmət Mərkəzinə müraciət edə bilərlər.

Nazirliyin məlumatına görə, fakt aidiyyəti xidmət tərəfindən araşdırılacaq.