Enerji eksperti: Elektrik tarifləri mütləq artırılmalıdır, qiymətlərin müəyyənləşdirilməsində siyasi amil aradan qaldırılmalıdır

Mövcud tariflər şəraitində enerji şirkətləri abonentlərə tamhüquqlu xidmət göstərə bilmir.

InterPress.ge xəbər verir ki, bu barədə “BusinessPressNews”a açıqlamasında enerji mütəxəssisi Gia Arabidze bildirib.

Onun sözlərinə görə, Gürcüstanda elektrik enerjisi tariflərinin artırılması qaçılmazdır və qiymətlərin formalaşmasına siyasi faktorların təsiri minimuma endirilməlidir. Arabidze vurğulayıb ki, mövcud tariflər enerji şirkətlərinə şəbəkələrin lazımi səviyyədə bərpası və abonentlərə keyfiyyətli xidmət göstərilməsi üçün imkan vermir.

Ekspert xatırladıb ki, Gürcüstanın Energetika və Su Təchizatı üzrə Milli Tənzimləmə Komissiyası – SEMEK elektrik enerjisi və təbii qaz üzrə tariflərin planlaşdırılan artımını təxirə salıb. Qurumun qərarına əsasən, mövcud tariflər müvəqqəti tariflər kimi müəyyən edilib və növbəti üç ay ərzində qüvvədə saxlanılacaq.

Gia Arabidzenin sözlərinə görə, ölkədə enerji infrastrukturunun xeyli hissəsi köhnəlib və bu, ciddi investisiyalar tələb edir. O qeyd edib ki, SEMEK-in qəbul etdiyi öhdəliyə əsasən, enerji şirkətləri 2030-cu ilədək təxminən 2 milyard lari həcmində investisiya yatırmalıdırlar ki, bu da şəbəkənin tam bərpasına və enerji təminatının daha təhlükəsiz və etibarlı olmasına xidmət edəcək.

Ekspert eyni zamanda vurğulayıb ki, tarif artımı dövlətin sosial cəhətdən həssas əhali qruplarının qorunması məsuliyyətini aradan qaldırmır. Onun fikrincə, sosial müdafiə mexanizmləri paralel şəkildə gücləndirilməlidir.

Arabidze əlavə edib ki, tarif artımının üç ay sonraya təxirə salınmasının hansı nəticə verəcəyi ayrıca müzakirə mövzusudur, lakin prinsipial məsələ ondan ibarətdir ki, istənilən məhsulun, o cümlədən elektrik enerjisinin qiymətinin formalaşmasında siyasi komponent maksimum dərəcədə kənarlaşdırılmalıdır. Bu halda həm enerji şirkətlərindən daha ciddi hesabat tələb etmək, həm də sistemin səmərəliliyini artırmaq mümkün olacaq.

“BusinessPressNews”un sualına cavab olaraq, SEMEK sədri Davit Narmanianın tarif artımının təxirə salınmasını enerji şirkətlərinin xahişi ilə əsaslandırmasını Gia Arabidze inandırıcı hesab etmədiyini deyib. Onun sözlərinə görə, şirkətlər il ərzində yeni tariflərin hesablanması üçün geniş sənədləşmə və hesablamalar aparıblar və bu prosesdən sonra artımdan imtina tələbinin irəli sürülməsi məntiqsiz görünür.

Ekspert yekunda bildirib ki, tariflərin artırılması təkcə şəbəkənin yenilənməsi üçün deyil, ümumilikdə enerji təminatının daha stabil və təhlükəsiz olması baxımından da zəruridir.