Çindən gələn 30-dan çox Gürcüstan vətəndaşı karantinə alındı

34 Gürcüstan vətəndaşı Çindən xüsusi reyslə vətənlərinə çatdırılıb və artıq onlar karantindədir.

InterPress.ge xəbər verir ki, bu barədə jurnalistlərə Milli Xəstəliklərə Nəzarət Mərkəzinin direktoru Amiran Gamkrelidze məlumat verib.

Gürcüstan hökuməti müxtəlif səbəblərə görə, avia bileti alıb Gürcüstana qayıda bilməyən həmvətənlərinin daşınmasını təşkil etdi. Bildiyiniz kimi, yanvar ayında yeni bir növ koronavirusun yayılması ilə əlaqədar olaraq, bir çox aviadaşıyıcı materik Çinin hava limanlarına uçuşları müvəqqəti dayandırdı.

Çinin Urumqi şəhərindən xüsusi reys gecə yarısından sonra Tbilisi Beynəlxalq Hava Limanına enib. Daha sonra vətəndaşları bir qrup həkim və epidemioloq qəbul edib.