Fransa bəzi şəhərlərdə qismən komendant saatı tətbiq edə bilər

Fransanın Baş naziri Sebastyan Lekornunun bəyanatına görə, bəzi şəhərlərin merlərinə qismən komendant saatı tətbiq etmək səlahiyyəti verilib. Bu addımın məqsədi əhalini və biznesləri qorumaqdır.

InterPress.ge xəbər verir ki, bu barədə Sebastyan Lekornu bildirib. Baş nazir həmin səlahiyyətin hansı şəhərlərin merlərinə verildiyini dəqiqləşdirməyib.

Lekornunun sözlərinə görə, hökumət zərər çəkmiş ərazilərin bərpası üçün vəsait ayıracaq. Maliyyələşdirmə zorakılıq əməllərinə görə məsuliyyət daşıyan şəxslərin hesabına təmin ediləcək.

“Əmlaka zərər vuran şəxslərin dəymiş ziyanı ödəməsini təmin edən mexanizmləri nəzərdə tutan qanun olacaq”, – deyə Sebastyan Lekornu bildirib.

Baş nazir həftəsonu yaranmış qeyri-sabit vəziyyətə görə məsuliyyətin ifrat solçu radikal qrupların üzərinə düşdüyünü deyib.

“İfrat solçu radikal qrupların rəhbərlik etdiyi bir hərəkat var. Onlar həqiqətən də sabitliyi pozmaq və ölkəmizdə prezident seçkilərinə qədər xaos yaratmaq istəyirlər”, – deyə Fransa hökumətinin başçısı qeyd edib.

Onun sözlərinə görə, yaranmış vəziyyət nəzərə alınaraq, siyasi görüşlər və toplantılar ətrafında təhlükəsizlik tədbirləri gücləndiriləcək. Məqsəd “qarşıdakı həftələr və aylar ərzində demokratiyanın maneəsiz fəaliyyət göstərməsini” təmin etməkdir.

“Ölkəni dağıntılara səbəb olan, oğurluq edən və xuliqanlıqla məşğul olan şəxslərin qaydalar müəyyənləşdirməsinə və idarə etməsinə imkan verməyəcəyik”, – deyə baş nazir vurğulayıb.

Lekornunun sözlərinə görə, həftəsonu keçirilən etiraz aksiyaları zamanı iğtişaşlarda və zorakılıqda iştirak etdiklərinə görə saxlanılan şəxslərin təxminən 80 faizinə qarşı cinayət ittihamları irəli sürülə bilər.