İrakli Kobaxidze: Qadağan edilməsi tələb olunan partiyaların siyahısına başqa siyasi qüvvənin əlavə olunacağını əvvəlcədən deyə bilmərəm

Gürcüstanın Baş naziri İrakli Kobaxidze qadağan edilməsi tələb olunan siyasi partiyaların siyahısına başqa siyasi qüvvənin əlavə olunub-olunmayacağını əvvəlcədən deyə bilməyəcəyini bildirib.

InterPress.ge xəbər verir ki, Kobaxidze bununla yanaşı, “Gürcü Arzusu”nun Giorgi Qaxarianın partiyasının da qadağan edilməsini niyə tələb etdiyini açıqlayıb.

“Siz iddianın yenilənməsinə nə əsas verdiyini bilirsiniz. Doğrudur, onlar parlamentə daxil oldular, lakin bu günə qədər konstitusiya quruluşunu tanımırlar, hakimiyyətin legitimliyini tanımırlar. Belə şəraitdə bu siyasi partiyanın fəaliyyətinin mahiyyəti digər müvafiq siyasi partiyaların apardığı fəaliyyətin mahiyyətindən heç nə ilə fərqlənmir. Buna görə də bizim fikrimizcə, bu konkret siyasi partiyanın da iddiaya əlavə edilməsi alternativsiz idi.

Vaxtilə onlar parlamentə yeni daxil olmuşdular və biz bu partiyaya konstitusiya quruluşunu tanıması üçün vaxt verdik. Lakin bütün bir sessiya keçdi, onlar konstitusiya quruluşunu tanımadılar, konstitusiya quruluşuna qarşı çıxdılar. Onların bu məzmunlu çoxsaylı bəyanatlarını tapa bilərsiniz. Onlar konstitusiya quruluşunu tanımırlar. Qalan məsələlər isə iddia ərizəsində təqdim olunub.

Proseslər də açıq olacaq və bizim arqumentlərimiz məhkəmə və cəmiyyət qarşısında açıq şəkildə təqdim ediləcək.

İşə baxılmanın nə vaxt başa çatacağına gəlincə, bu, məhkəmədən asılıdır. Maksimum müddət 9 aydır. Bizim istəyimiz odur ki, proses 9 ay davam etməsin. Məhkəmənin necə qərar verəcəyi isə onun işidir”, – deyə Kobaxidze bildirib.

Qadağan edilməsi tələb olunan partiyaların siyahısına daha bir partiyanın əlavə olunub-olunmayacağı barədə suala Kobaxidze “bunu əvvəlcədən deyə bilmərəm” cavabını verib.

“Əvvəlcədən heç nə deyə bilmərəm. Düşünürəm ki, bu, məhkəmənin ətrafında müzakirə aparmalı olduğu tam siyahıdır. Hazırkı vəziyyət belədir”, – deyə Baş nazir bildirib.

Məlumat üçün bildirək ki, “Gürcü Arzusu” “Gürcüstan üçün Qaxaria” partiyasının qadağan edilməsi ilə bağlı Konstitusiya Məhkəməsinə də müraciət edir.

Bu həftə Konstitusiya Məhkəməsinə yenilənmiş konstitusiya iddiasının təqdim ediləcəyi və həmin iddiaya keçmiş Baş nazir Giorgi Qaxarianın partiyasının da əlavə olunacağı bildirilir.