İrakli Kobaxidze: “Gürcüstan Orta Dəhlizin ayrılmaz hissəsidir”

Gürcüstanın Baş naziri İrakli Kobaxidze Batumidə keçirilən Gürcüstan Beynəlxalq Dəniz Forumunda çıxışı zamanı qlobal iqtisadiyyatın yeni çağırışları fonunda marşrutların şaxələndirilməsi, təchizat zəncirlərinin dayanıqlılığı və Avropa ilə Asiya arasında etibarlı əlaqələrin rolunun getdikcə artdığını bildirib.

InterPress.ge xəbər verir ki, Baş nazirin sözlərinə görə, Gürcüstan əsrlər boyu Şərqlə Qərbin, Avropa ilə Asiyanın qovuşduğu məkan olub və bu gün böyük potensiala və strateji əhəmiyyətə malik Orta Dəhlizin ayrılmaz hissəsidir.

“Bu gün Batumidə Gürcüstan Beynəlxalq Dəniz Forumunda tərəfdaş dövlətlərin, beynəlxalq təşkilatların nümayəndələrini və dənizçilik sahəsinin peşəkarlarını qəbul etməkdən məmnunam.

Dəniz Forumunun keçirilməsi qlobal iqtisadiyyatın yeni çağırışları fonunda xüsusi əhəmiyyət daşıyır. Belə ki, marşrutların şaxələndirilməsi, təchizat zəncirlərinin dayanıqlılığı və Avropa ilə Asiya arasında etibarlı əlaqələrin rolu getdikcə artır. Gürcüstan əsrlər boyu Şərqlə Qərbin, Avropa ilə Asiyanın qovuşduğu məkan olub və bu gün biz böyük potensiala və strateji əhəmiyyətə malik Orta Dəhlizin ayrılmaz hissəsiyik. Dünya Bankının qiymətləndirməsinə görə, müvafiq investisiyalar qoyulduğu və səmərəlilik artırıldığı təqdirdə, 2030-cu ilədək Orta Dəhliz üzrə yükdaşımaların həcmi üç dəfə arta, daşınma müddəti isə iki dəfə azala bilər.

Biz bu imkanlardan istifadə etmək üçün uzunmüddətli plan hazırlamışıq. 2032-ci ilədək əsas nəqliyyat və logistika infrastrukturunun inkişafı üçün təxminən 7 milyard ABŞ dolları səfərbər etməyi planlaşdırırıq.

10 illik planımız dəmir yolunun ötürücülük qabiliyyətinin iki dəfə artırılmasını və yükdaşımaların müddətinin yarıya endirilməsini, limanların ötürücülük qabiliyyətinin iki dəfə, beynəlxalq hava limanlarının isə üç dəfə artırılmasını nəzərdə tutur.

Bu baxış artıq konkret addımlar və mühüm investisiyalarla müşayiət olunub. Gürcüstan Dəmir Yollarının tarixi yenilənməsinə başlamışıq. Təkcə cari ildə dəmir yolu infrastrukturunun və hərəkət tərkibinin yenilənməsi üçün 1 milyard laridən çox investisiya həyata keçiriləcək.

Şərq-Qərb beynəlxalq avtomagistralının tikintisinin artıq 75%-i başa çatdırılıb”, - deyə Baş nazir bildirib.

Kobaxidzenin sözlərinə görə, həyata keçirilən investisiyaların və Gürcüstan hökumətinin ardıcıl siyasətinin nəticələri sektorun göstəricilərində öz əksini tapır.

Baş nazir bildirib ki, artan yük axını fonunda liman imkanlarının daha da inkişaf etdirilməsi xüsusi əhəmiyyət daşıyır və bu məqsədə Anakliya dərin dəniz limanı layihəsi xidmət edir. Onun sözlərinə görə, limanın tikintisi hazırda fəal şəkildə davam etdirilir.

“İnvestisiyaların həyata keçirilməsi və Gürcüstan hökumətinin ardıcıl siyasətinin nəticələri sektorun göstəricilərində öz əksini tapır. 2026-cı ildə həm dəniz və dəmir yolu, həm də aviasiya istiqamətlərində rekord dinamika müşahidə olunur. Dəniz sektorunda ‘vahid pəncərə’ sisteminin tətbiqi ilə limanlarda gəmilərə xidmət prosedurları rəqəmsallaşdırılıb və daha da sadələşdirilib.

Artan yük axını fonunda liman imkanlarımızın daha da inkişaf etdirilməsi xüsusi əhəmiyyət daşıyır. Məhz bu məqsədə Anakliya dərin dəniz limanı layihəsi xidmət edir və onun tikintisi fəal şəkildə davam etdirilir. Anakliya limanını ‘Landlord Port Model’ əsasında inkişaf etdirəcəyik. Bu model çərçivəsində dövlət əsas strateji liman infrastrukturunu təmin edəcək, özəl sektor isə terminalların inkişafı və istismarını həyata keçirəcək. Bu yanaşma dövlətin strateji maraqları ilə özəl sektorun iştirakını balanslaşdırır, geniş regional və beynəlxalq iştirak üçün imkanlar yaradır və liman infrastrukturuna ədalətli çıxışı təmin edir”, - deyə İrakli Kobaxidze bildirib.