Polşalı siyasətçini prezident Navrotskini "Şrek"ə bənzətdiyinə görə 3 ilə qədər həbs cəzası gözləyir

Polşalı siyasətçi Voyçex Şlusarçik ölkə prezidenti Karol Navrotskini "Şrek" obrazı ilə müqayisə etdiyinə görə cinayət məsuliyyətinə cəlb edilib və onu 3 ilə qədər azadlıqdan məhrumetmə cəzası gözləyir.

InterPress.ge xəbər verir ki, yerli KİV-in məlumatına əsasən, Şlusarçik sosial şəbəkədə prezidentin həyat yoldaşı Marta Navrotskanın fotosunu paylaşaraq "Bəs Şrek haradadır?" sualını yazıb. Bununla o, Marta Navrotskanı cizgi filminin qəhrəmanı Şahzadə Fionaya bənzədib.

Bu paylaşım əsasında prokurorluq siyasətçiyə prezidenti təhqir etmək ittihamı irəli sürüb.

Şübhəli şəxs isə ittihamı qəbul etmir. O bildirib ki, paylaşımında Karol Navrotskinin adı ümumiyyətlə çəkilməyib. Şlusarçik əlavə edib ki, hər halda, Şrek müsbət obraz olduğu üçün onunla müqayisə təhqir sayıla bilməz.

Gazeta Radomszczańska nəşrinin yaydığı məlumata görə, prokurorluq ötən ay siyasətçiyə rəsmi ittiham irəli sürüb.

Bundan başqa, Voyçex Şlusarçikə Marta Navrotskanı – dövlət vəzifəlisi deyil, fiziki şəxs qismində – kütləvi informasiya vasitəsilə təhqir etmək ittihamı da verilib. Bu əməlin cəzası 1 ilədək azadlıqdan məhrumetmə nəzərdə tutur.