Avropa Komissiyasının baş qərargahında kondisioner sistemi mərtəbələr üzrə söndürüldü
Avropa Komissiyasının baş qərargahı olan Berlaymont binasında havalandırma və soyutma sistemi seçmə qaydada söndürülüb.
InterPress.ge xəbər verir ki, bu barədə POLITICO nəşri məlumat yayıb.
Məlumata görə, binada çalışan əməkdaşlar günorta saatlarında qısa mesaj alıblar. Mesajda bildirilib:
"Berlaymont – Təcili. Ekstremal hava şəraiti səbəbindən günün sonunadək binanın 1-ci mərtəbəsindən 7-ci mərtəbəsinədək havanın soyudulması sistemi söndürüləcək."
13 mərtəbəli Berlaymont binasında Avropa Komissiyasının prezidenti Ursula fon der Lyayenin, onun 26 komissarının və təxminən 3 min əməkdaşın ofisləri yerləşir. Ursula fon der Lyayen 13-cü mərtəbədə çalışır, komissarların əksəriyyətinin ofisləri isə 8-ci və daha yuxarı mərtəbələrdə yerləşir.
Yüksək temperaturla əlaqədar Avropa Komissiyası həftənin əvvəlində əməkdaşlara tövsiyələr göndərib. Lakin bu tövsiyələr kondisioner olmayan mərtəbələrdə, o cümlədən Kənd Təsərrüfatı və Kənd İnkişafı üzrə Baş Direktorluqda çalışan əməkdaşların narazılığına səbəb olub. Bu barədə POLITICO tərəfindən əldə edilən daxili yazışmalarda qeyd olunur.
"Bu, feodalizmi xatırladır", – deyə Berlaymont binasının aşağı mərtəbələrində çalışan Komissiya əməkdaşlarından biri POLITICO-ya bildirib. Onun sözlərinə görə, komissarların yerləşdiyi yuxarı mərtəbələrdə kondisioner işləyir, aşağı mərtəbələrdə isə söndürülüb. Komissiyanın bəzi əməkdaşları bu qərarı "biabırçılıq" adlandırıblar.
8-ci mərtəbədə çalışan əməkdaşlardan biri isə bildirib ki, kondisioner işlədiyi halda belə otaqdakı temperatur +25,7 dərəcə təşkil edib.
İsti hava Avropada yaşayış evləri və ofislərdə kondisioner sistemlərinin çatışmazlığı ilə bağlı müzakirələri yenidən gündəmə gətirib. Qitədə ailələrin yalnız beşdə birində kondisioner var.
Belçikada qatarların təxminən beşdə biri kondisionersiz fəaliyyət göstərir. Bu səbəbdən ölkənin milli dəmir yolu şirkəti pik saatlarda bir sıra reysləri ləğv edib.
Bu həftə Avropa Parlamenti də oxşar problemlə üzləşib. Soyutma sisteminin maksimum gücdə işləməsi elektrik enerjisi sərfiyyatını kəskin artırıb və nəticədə elektrik təchizatında fasilələr yaranıb.
