Zaza Şatirişvili: Avropa İttifaqı dərin böhran içindədir – Avropalıların əksəriyyəti gələcəyə ümidsiz baxır
Filosof Zaza Şatirişvili yazır ki, qısa zaman kəsiyində Avropa İttifaqı miqyasında ictimai rəy üzrə artıq ikinci genişmiqyaslı sorğunun nəticələri açıqlanıb. Bu dəfə araşdırmanı tanınmış və nüfuzlu FGS Global şirkəti hazırlayıb və tədqiqat avropalıların siyasi, sosial və ictimai əhval-ruhiyyəsini əhatə edir.
Şatirişvilinin sözlərinə görə, əhalinin öz hökumətlərinə və ümumilikdə Aİ-nin siyasi elitasına münasibətdə dərin nihilizm və ümidsizlik nümayiş etdirdiyini göstərən bu sorğu müxtəlif Avropa ölkələrinin kütləvi informasiya vasitələrində geniş işıqlandırılır.
Filosof bildirir ki, tədqiqatın əsas mesajı belədir: respondentlərin 63 faizi “Avropa İttifaqının ən yaxşı illərinin artıq geridə qaldığını” düşünür, 77 faizi isə növbəti nəsil üçün həyatın öz ölkələrində “daha çətin olacağı” qənaətindədir.
Onun sözlərinə görə, ilk baxışdan həm bu gün açıqlanan, həm də iki ay əvvəl Ipsos tərəfindən aparılmış araşdırmalar Aİ-nin dərin böhranını üzə çıxarır. Lakin Şatirişvili vurğulayır ki, söhbət sadəcə növbəti ictimai rəy sorğusundan getmir və bu tədqiqatların yayılmasının konkret məqsəd və hədəfləri var.
“Bundan əvvəl Ipsos-un da genişmiqyaslı sorğusu olmuşdu. Şirkət rəhbərlərinin bildirdiyinə görə, bu araşdırma beş ay ərzində hazırlanıb və Aİ-yə üzv demək olar ki, bütün ölkələrdə aparılıb. Həmin sorğu da avropalıların skeptisizm və ümidsizlik səviyyəsinin rekord həddə çatdığını göstərirdi. Ipsos-un qənaətinə görə, Avropada demokratiya dərin böhran yaşayır, ölkə hökumətləri xalqın səsini ifadə etmir, korrupsiya təhlükəli həddə çatıb, Avropa İttifaqının gələcəyi isə daha da qeyri-müəyyən və ümidsiz görünür. Təşkilat bu narazılığın arxasında Avropa əhalisinin 65 faizinin dayandığını bildirir.
İlk baxışdan həm indiki, həm də iki ay əvvəlki tədqiqatlar sadə bir mənzərə ortaya qoyur: Avropa İttifaqının problemlərini anlamaq üçün böyük iqtisadi biliklərə ehtiyac yoxdur, birliyin dərin böhranı onsuz da göz önündədir. Lakin məsələ göründüyü qədər sadə deyil və aydındır ki, bu, sadəcə adi ictimai rəy sorğusu deyil. Bu cür son dərəcə neqativ və siyasi baxımdan zərərli sosioloji nəticələrin yayılmasının konkret məqsəd və tapşırıqları var”, – deyə Zaza Şatirişvili sosial şəbəkədə paylaşdığı yazısında qeyd edib.
