Ukrayna BMT-də Rusiyanın işğalı altındakı ərazilərdə insan hüquqlarının pozulması ilə bağlı ciddi narahatlığını ifadə edib
Ukrayna Rusiyanın işğalı altında olan Gürcüstan ərazilərində insan hüquqlarının sistemli şəkildə pozulması ilə bağlı ciddi narahatlığını ifadə edib.
InterPress.ge xəbər verir ki, bu barədə Ukraynanın BMT-nin Cenevrə ofisindəki daimi nümayəndəsi Yevgeni Tsımbalyuk, BMT İnsan Hüquqları Şurasının Universal Dövri İcmal (UPR) mexanizminin 51-ci sessiyası çərçivəsində Gürcüstanın milli hesabatının müzakirəsi zamanı çıxışında bildirib.
Tsımbalyukun sözlərinə görə, Ukrayna Gürcüstanda insan hüquqlarının vəziyyətində müəyyən irəliləyişləri qeyd edir. O, xüsusilə əlilliyi olan şəxslərin hüquqlarının qorunması, uşaq hüquqları və qadınlara qarşı zorakılıqla mübarizə sahəsində atılan addımları müsbət qiymətləndirib.
Bununla yanaşı, Ukrayna nümayəndəsi son dövrlərdə qəbul edilmiş qanunvericilik dəyişikliklərinə də diqqət çəkərək bildirib ki, bu dəyişikliklər vətəndaş məkanının daralması və vətəndaş cəmiyyəti üçün risklərin artması təhlükəsi yaradır.
“Konstruktiv əməkdaşlıq ruhunda tövsiyəmiz ondan ibarətdir ki, Gürcüstan ‘Xarici təsirin şəffaflığı haqqında’ qanunu və ‘Xarici agentlərin qeydiyyatı aktı’nı ləğv etsin, bütün siyasi məhbusları azadlığa buraxsın, ‘Dövlət qulluğu haqqında’ qanuna edilmiş regressiv dəyişiklikləri geri çəksin və hüquqi çərçivəni insan hüquqları üzrə beynəlxalq standartlara uyğunlaşdırsın”, – deyə Ukraynanın BMT-dəki daimi nümayəndəsi vurğulayıb.
