Gürcüstanda ev heyvanları ilə bağlı yeni tənzimləmələrin hazırlanması davam edir
Ətraf Mühitin Mühafizəsi və Kənd Təsərrüfatı nazirinin müavini Laşa Avoliani parlamentin Ətraf Mühitin Mühafizəsi və Təbii Resurslar Komitəsinin üzvlərinə “Ev Heyvanları Haqqında” qanuna aid qanunvericilikaltı aktların hazırlanma prosesi barədə məlumat verib.
Nazir müavininin sözlərinə görə, hazırda qanunvericilikaltı aktların qəbul edilməsi istiqamətində fəal iş aparılır. Bu məqsədlə Ətraf Mühitin Mühafizəsi və Kənd Təsərrüfatı Nazirliyi, Səhiyyə və Qida Təhlükəsizliyi Milli Agentliyi və Regional İnkişaf Nazirliyinin nümayəndələrinin daxil olduğu işçi qrupu yaradılıb.
Laşa Avoliani 2026–2028-ci illəri əhatə edən küçə və ev itlərinin say çoxluğunun idarə olunmasına dair müvəqqəti tənzimləmə proqramının fəaliyyət planı haqqında da danışıb. Onun sözlərinə görə, bu plan həm sahibsiz, həm də sahibli ev heyvanlarının identifikasiya və qeydiyyatını, həmçinin sterilizasiya və ya kastrasiya prosesinin həyata keçirilməsini nəzərdə tutur.
Komitə sədri Maia Bitadze isə qeyd edib ki, ev heyvanı sahibləri üçün genişmiqyaslı məlumatlandırma kampaniyasının aparılması vacibdir. Onun sözlərinə görə, sahiblər mövcud çiplənmiş heyvanları ilə bağlı məlumatları vahid elektron məlumat bazasına daxil etmək öhdəliyinə malik olacaqlar.
