20 Yanvar – Azərbaycan tarixində dönüş nöqtəsi
1990-cı ilin 20 Yanvar gecəsi Azərbaycanın paytaxtı Bakı şəhərində baş verən hadisələr, həm sovet rejiminin zorakılığını, həm də Azərbaycanın müstəqillik uğrunda apardığı mübarizənin dərinliyini ortaya qoydu. Həmin gecə Sovet İttifaqının 26 minlik qoşun kontingenti, ağır texnika və tanklarla Bakıya daxil olaraq dinc əhalini hədəf aldı.
InterPress.ge xəbər verir ki, bu hərbi müdaxilə nəticəsində 147 nəfər həlak oldu, 744 nəfər ağır yaralandı, 841 nəfər isə qanunsuz olaraq həbs edildi.
Bu qanlı hadisələrin qurbanları arasında qadınlar, uşaqlar və yaşlı insanlar da yer alırdı. Sovet qoşunlarının həyata keçirdiyi əməliyyat təkcə Bakıda deyil, Azərbaycanın digər şəhərlərində və rayonlarında da ağır fəsadlara yol açdı. Bu müdaxilə, eyni zamanda, beynəlxalq hüquq normalarının və insan hüquqlarının kobud şəkildə pozulması kimi qiymətləndirilir.
20 Yanvar hadisələri Azərbaycan xalqının milli azadlıq və suverenlik uğrunda mübarizəsində mühüm rol oynadı. Həmin faciə xalqın iradəsini sarsıtmaq əvəzinə, müstəqillik yolunda yeni bir mərhələ açdı. 1991-ci ilin oktyabrında Azərbaycanın müstəqilliyi bərpa edilərkən, bu hadisələrin şəhidlərinin tökülən qanları müstəqillik üçün böyük mənəvi dayağa çevrildi.
Bu hadisə ilə bağlı bir çox beynəlxalq təşkilatlar və dövlətlər də narahatlıqlarını ifadə ediblər. Sovet İttifaqının bu hərəkəti beynəlxalq ictimaiyyət tərəfindən ciddi qınanmış və insan hüquqlarına zidd bir hərbi cinayət kimi qiymətləndirilib.
Hər il 20 Yanvar günü bu faciə qurbanlarının xatirəsi Azərbaycanın müxtəlif yerlərində anılır. Şəhidlər Xiyabanı, bu ağır gecədə həyatını itirənlərin xatirəsinə ucaldılmış əbədi məkan olaraq, xalqın ehtiramını ifadə edir. Azərbaycan xalqı üçün bu tarix təkcə hüzn deyil, həm də azadlıq və qəhrəmanlıq simvoludur.
147 nəfərin həyatını itirdiyi, 744 nəfərin yaralandığı və yüzlərlə insanın həbs edildiyi bu hadisə, dünya tarixində totalitar rejimlərin törətdiyi qanlı cinayətlərdən biri kimi yaddaşlara həkk olunub.
