Arçil Talakvadze: "Azərbaycanda çox mühüm görüşlərimiz olacaq"

Gürcüstan parlamentinin nümayəndə heyətinin parlament sədrinin rəhbərliyi ilə Azərbaycana rəsmi səfəri başlayıb.

InterPress.ge xəbər verir ki, bunu Gürcüstan parlamentinin vitse-spikeri Arçil Talakvadze Bakıda jurnalistlərə deyib.

Arçil Talakvadzenin qeyd etdiyinə görə, səfər çərçivəsində strateji tərəfdaşla mühüm görüşlər nəzərdə tutulub.

“Bu iki gün ərzində strateji tərəfdaşla, həm parlamentin sədri, həm dostluq qrupunun rəhbəri, həm də Azərbaycan prezidenti ilə çox mühüm görüşlərimiz olacaq. Biz minnətdarıq ki, Azərbaycan Gürcüstanın Avropaya inteqrasiyasına güclü dəstəyini ifadə edib və bu, əlbəttə ki, ölkələrimiz və hökumətlərimiz arasında mövcud olan münasibətlərin və dostluğun davamıdır. Təbii ki, Gürcüstan da öz növbəsində regionda sülh və təhlükəsizliyi dəstəkləmək üçün vacib rolu oynamağa hazırdır və biz diqqətimizi gələcəyə və regionumuzun və ölkələrimizin ehtiyac duyduğu planlara yönəldirik. Biz burada, Azərbaycandakı dostlarımızla müsbət və səmərəli səfərin olacağını gözləyirik”, - deyə Arçil Talakvadze bildirib.