Mamuka Mdinaradzeyə 2027-ci il avqustun 1-dək dövlət mühafizəsi təyin edildi

Gürcüstanın sabiq vitse-baş naziri və regional inkişaf naziri Mamuka Mdinaradzeyə dövlət mühafizəsi təyin olunub. Müvafiq qərarı Gürcüstanın Baş naziri İrakli Kobaxidze qəbul edib.

InterPress.ge xəbər verir ki, məsələni tənzimləyən hökumət sərəncamı sentyabrın 8-də imzalansa da, sənəd hökumətin rəsmi internet səhifəsində bir qədər əvvəl dərc olunub.

Sənədə əsasən, Mamuka Mdinaradzeyə mövcud əsaslardan irəli gələn zərurət aradan qalxanadək, lakin 2027-ci il avqustun 1-dək dövlət mühafizəsinin minimal standartlarına uyğun şəkildə dövlət mühafizəsi təyin edilib.

“‘Dövlət Xüsusi Mühafizə Xidməti haqqında’ Gürcüstan qanununun 5-ci maddəsinin 4¹ bəndinin ‘b’ yarımbəndinə və Gürcüstan hökumətinin 2020-ci il 5 fevral tarixli 73 nömrəli qərarı ilə təsdiq edilmiş ‘Dövlət Xüsusi Mühafizə Xidməti tərəfindən mühafizə olunan şəxslərin siyahısı’nın 2-ci bəndinin ‘v’ yarımbəndinə əsasən, Gürcüstan hökumətinin sabiq üzvü Mamuka Mdinaradzeyə müvafiq əsaslardan irəli gələn zərurət aradan qalxanadək, 2027-ci il avqustun 1-dək dövlət mühafizəsinin minimal standartlarına uyğun dövlət mühafizəsi təyin edilsin. Mühafizə tədbirlərinin həyata keçirilməsi Dövlət Xüsusi Mühafizə Xidməti tərəfindən təmin edilsin”, - sənəddə qeyd olunub.

Qanunvericiliyə əsasən, hökumətin qərarı ilə vəzifəli şəxsə səlahiyyətlərinə xitam verildikdən sonra da şəxsi mühafizə təyin edilə və ya saxlanıla bilər. Bu, həmin şəxsin həyatı və ya sağlamlığı üçün təhlükə olduğuna dair kifayət qədər məlumat və ya aidiyyəti qurumdan müvafiq informasiya olduğu halda mümkündür.

Xatırladaq ki, son olaraq vitse-baş nazir və regional inkişaf naziri vəzifəsini tutan Mamuka Mdinaradze avqustun 27-də Hökumət Administrasiyasında keçirilən fövqəladə brifinqdə vəzifəsindən istefa verdiyini və siyasətdən getdiyini açıqlamışdı.