David Matikaşvili: “Girov məcburidir və bu, hamıya aiddir”
Parlamentin Prosedur Məsələləri Komitəsinin sədri David Matikaşvili Elene Xoştariyanın işi ilə bağlı açıqlama verib.
InterPress.ge xəbər verir ki, o bildirib ki, girovun ödənilməsi qanunla məcburidir və bu tələb istisnasız olaraq hər kəsə şamil olunur.
Onun sözlərinə görə, siyasi status heç kim üçün imtiyaz yaratmır.
“Siyasi mantiya heç kim üçün, o cümlədən radikal müxalifət nümayəndələri üçün də indulgensiya ola bilməz. Əgər girovu bilərəkdən ödəmirsənsə və sənə qarşı cinayət-prosessual tədbirlər görülürsə, bu, gözlənilən nəticədir və bunu anlamaq üçün xüsusi uzaqgörənlik lazım deyil”, – deyə Matikaşvili bildirib.
O qeyd edib ki, bu cür hallar məqsədli şəkildə təqdim olunur ki, guya Gürcüstanda insanlara qarşı təzyiq var.
“Onlara bu vəziyyət lazımdır ki, göstərsinlər – baxın, Gürcüstanda insanlara necə təzyiq edilir. Elene Xoştariya məhz ona görə həbsdədir ki, ona tətbiq olunan daha yüngül tədbiri – girovu yerinə yetirmədi”, – deyə o vurğulayıb.
Matikaşvili həmçinin xatırladıb ki, analoji vəziyyət daha əvvəl Nika Melia ilə bağlı da yaşanmışdı və həmin iş üzrə Avropa İnsan Hüquqları Məhkəməsi Gürcüstanın mövqeyini haqlı hesab etmişdi.
Qeyd edək ki, Tbilisi Şəhər Məhkəməsinin qərarı ilə “Droa” partiyasının lideri Elene Xoştariya 1 il 6 ay müddətinə azadlıqdan məhrum edilib.
Xoştariya 2025-ci il 15 sentyabr tarixində saxlanılıb. Ona qarşı Cinayət Məcəlləsinin 187-ci maddəsi (başqasının əmlakına ziyan vurma, əhəmiyyətli zərər törətməklə) ilə ittiham irəli sürülüb. Hadisə sentyabrın 14-də Kaxa Kaladzenin seçki qərargahı yaxınlığında baş verib.
Elene Xoştariya Kaladzenin seçki bannerinin üzərinə “Rus arzusu” yazısını əlavə edib. O, bu addımı ilə Meqi Diasamidze ilə həmrəylik göstərdiyini bildirib. Diasamidze də eyni fakt üzrə saxlanılmış, daha sonra girov qarşılığında azadlığa buraxılmışdı.
Məhkəmə Xoştariyaya qarşı 5 000 lari məbləğində girov qətimkan tədbiri seçmişdi. O, girovu ödədiyi halda azadlığa buraxıla bilərdi, lakin siyasətçi girovu ödəməkdən imtina edib.
