Gia Volski: “Xoştariya flomasterə görə yox, ekstremizmə görə cəzalandırılıb”
Gürcüstan parlamentinin birinci vitse-spikeri Gia Volski Elene Xoştariyaya çıxarılan hökmə münasibət bildirib.
InterPress.ge xəbər verir ki, Volski Xoştariyanın fəaliyyətini “inqilabi proseslərdə iştirak” kimi qiymətləndirib və onun cəzalandırılmasının səbəbinin yalnız banner üzərində yazı yazmaq olmadığını qeyd edib.
Onun sözlərinə görə, Xoştariya öz hərəkətlərini nəinki inkar etmir, əksinə, onları doğru hesab edir.
“Təəssüf doğurur ki, dörd uşaq anası inqilabi proseslərdə iştirak edir və etdiyi əməli nəinki inkar etmir, əksinə, düzgün etdiyini bildirir və imkan olsa daha ağır addımlar atacağını deyir”, – deyə Volski bildirib.
O qeyd edib ki, Xoştariya pirotexnikanı “öz silahı” adlandırıb və bununla ölkədə mövcud sabitliyə qarşı çıxmaq niyyətindədir.
Volski həmçinin bildirib ki, Xoştariyanın tərəfdarları bu işi “flomaster işi” adlandırsa da, məsələ bundan daha ciddidir.
“Onun tərəfdarları Saakaşvilinin işlərinə ‘pencək işi’ dedikləri kimi, buna da ‘flomaster işi’ deyirlər. Amma reallıq göstərir ki, dövlət özünü qorumalıdır. Xüsusilə də dünyada mövcud vəziyyəti nəzərə alaraq, Gürcüstana qarşı yönəlmiş siyasətə qarşı qanunlar qəbul edilməlidir”, – deyə o vurğulayıb.
Volskinin sözlərinə görə, Xoştariya və onun kimi düşünən siyasi fiqurların əsas məqsədi hakimiyyətin inqilab yolu ilə dəyişdirilməsidir.
“Onların məqsədi inqilab yolu ilə hakimiyyətə gəlmək və ölkəni xarici siyasi qüvvələrdən asılı vəziyyətə salmaqdır. Bu proses çərçivəsində fiziki qarşıdurmanın təşkili də daxil olmaqla müxtəlif addımlar atılır”, – deyə o bildirib.
O əlavə edib ki, Xoştariya flomasterlə bannerə yazı yazdığı üçün deyil, “inqilabi ssenarinin inkişaf etdirilməsinə cəhd etdiyi üçün” cəzalandırılıb.
“Bu, flomaster məsələsi deyil. O, ekstremizmə görə cəzalandırılıb. Bannerin zədələnməsi də hüquqi pozuntudur, lakin bu, onun həyata keçirməyə çalışdığı daha ciddi planlarla müqayisədə daha yüngüldür”, – deyə Volski qeyd edib.
Sonda o bildirib ki, Xoştariyanın müttəhim kürsüsünə çıxması təəssüf doğurur, lakin bu, onun konkret hərəkətlərinin nəticəsidir.
Qeyd edək ki, Tbilisi Şəhər Məhkəməsinin qərarı ilə Elene Xoştariya 1 il 6 ay müddətinə azadlıqdan məhrum edilib.
