Marneulidə bıçaq hədəsi ilə quldurluq edən şəxs saxlanıldı - VİDEO

Gürcüstan Daxili İşlər Nazirliyinin Kvemo Kartli Polis Departamentinin Marneuli Rayon İdarəsinin əməkdaşları quldurluq ittihamı ilə 2006-cı il təvəllüdlü Z.D.-ni saxlayıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat verib. 

İstintaqla müəyyən edilib ki, şübhəli şəxs Marneuli bələdiyyəsində yaşayan 1962-ci il təvəllüdlü A.P.-ni bıçaqla hədələyərək quldurluq edib, zərərçəkənin üzərində olan zinət əşyalarını və 14 min lari məbləğində pulu ələ keçirərək hadisə yerindən qaçıb.

Hüquq-mühafizə orqanları tərəfindən aparılan əməliyyat-istintaq tədbirləri nəticəsində Z.D. təqsirləndirilən şəxs qismində saxlanılıb.

Faktla bağlı istintaq Gürcüstan Cinayət Məcəlləsinin 179-cu maddəsinin birinci hissəsi ilə aparılır.