Azərbaycanın Baş naziri Əli Əsədov Türkiyə hərbi təyyarəsinin qəzaya uğraması ilə bağlı Gürcüstanın Baş naziri İrakli Kobaxidze ilə telefonla danışıb

Türkiyəyə məxsus hərbi-nəqliyyat təyyarəsinin Gürcüstan ərazisində qəzaya uğraması ilə bağlı Azərbaycanın Baş naziri Əli Əsədov Gürcüstanın Baş naziri İrakli Kobaxidze ilə telefonla əlaqə saxlayıb.

InterPress.ge xəbər verir ki, məlumatı Azərbaycan mediası yayıb.

Məlumatlara görə, Azərbaycan Prezidenti İlham Əliyevin tapşırığı ilə Əli Əsədov Gürcüstan rəhbərliyinə başsağlığı verib və bildirib ki, Azərbaycan qəzanın nəticələrinin aradan qaldırılması üçün bütün lazımi yardımı göstərməyə hazırdır.

Əsədov qeyd edib ki, Azərbaycan Fövqəladə Hallar Nazirliyi Gürcüstana xilasetmə və axtarış əməliyyatlarına qatılmaq məqsədilə xüsusi qrup göndərməyə hazırdır. O, həmçinin digər yardım tədbirlərinin görülməsinə də hazırlığını ifadə edib.

Gürcüstan tərəfi dəstəklə bağlı minnətdarlığını bildirib və qeyd edib ki, ölkənin aidiyyəti qurumları artıq hadisə yerində işləyirlər.

Söhbət zamanı bildirilib ki, Azərbaycanın Fövqəladə Hallar Nazirliyi və Rəqəmsal İnkişaf Nazirliyi Gürcüstanlı həmkarları ilə birbaşa əlaqədədir.

Tərəflər hadisə ilə bağlı əməkdaşlığın və operativ əlaqələrin davam etdirilməsi barədə razılığa gəliblər.

Qeyd edək ki, Gürcüstan Daxili İşlər Nazirliyinin məlumatına əsasən, Sığnaqı bələdiyyəsində, dövlət sərhədindən təxminən 5 kilometr məsafədə, Türkiyə Hərbi Hava Qüvvələrinə məxsus təyyarə qəzaya uğrayıb. İlkin məlumata görə, təyyarə Azərbaycan–Türkiyə marşrutu ilə uçurdu.

Hadisə ilə bağlı Gürcüstan Cinayət Məcəlləsinin 275-ci maddəsinin 4-cü bəndi üzrə istintaq aparılır. Bu maddə hava nəqliyyatı təhlükəsizliyi və istismarı qaydalarının pozulması nəticəsində insan ölümünə səbəb olma hallarını nəzərdə tutur.